Tindahan gidaro 1 patay

CEBU, Philippines - Usa ka 30-anyos nga dalaga ang namatay human nawad-an og preno ang trak de karga ug midasmag sa ilang tindahan daplin sa karsada sa barangay Lobo lungsod sa Sogod kagahapon sa alas 9:00 sa buntag.Ang patay nang nadangat sa tambalanan mao si Janice Bancali, 30 anyos, dalaga apan giingong dunay kapuyo nga tomboy nga maoy tag-iya sa nadasmagan nga tindahan ug lumad nga taga barangay Buaya siyudad sa Lapulapu.Samtang ang Isuzu dumptruck nga dunay plaka nga GFV-479 gipanag-iya sa municipal engineer sa lungsod sa Sogod nga si Engr. Rodney Menchavez nga gimaneho ni Rene Roble Rosales, 35 anyos, molopyo sa lungsod sa Tuburan.

Matud pa ni PO3 Elimar Mendoza, imbestigador sa Sogod police dihang nahinabi sa Banat News subay sa inisyal nga imbestigasyon ang maong dump truck gikan sa barangay Damolog paingon sa lungsod sa Tuburan.Apan samtang nagdagan ang maong trak aksidenteng nakasugat og kakulian ang preno niini hinungdan nga nawad-an og kontrol ang drayber ug midasmag sa naglinya nga duha ka tindahan daplin sa karsada nga gipanag-iya ni Elbert Brigoli ug milahos sa tindahan ni Liezel Brigoli.Naatol nga ang kapuyo ni Liezel nga si Janice maoy diha sa tindahan niadtong higayuna ug tungod sa kakusog sa impact natumpag gyud ang kongkretong sementadong bongbong sa tindahan ug natabunan ang biktima.

Daling gitabang sa mga silingan ug drayber ang biktima ug gihatod sa Juan Dosado Memorial Hospital sa barangay Damolog apan gideklarar nga dead on arrival tungod sa grabeng kadaot sa kalawasan. – BANAT NEWS