Lahugay sa CCPO gipatuman

CEBU, Philippines - Pormal nang nilingkod kagahapong adlawa ang bag-ong hepe sa lungsod sa Minglanilla Chief Insp. Joveto Canlapan human sa gipahigayong turnover ceremony sa buhatan ni Sr. Supt. Erson Digal ang director sa Cebu Provincial Police Office (CPPO).

Si Canlapan gikan sa lungsod sa San Fernando mihulip kang Sr. Insp. Leoncio Baliguat Jr. kinsa adto nadestino sa Sta. Fe Police Station.

Samtang ang hepe sa Sta. Fe Police Station gibalhin usab isip officer-in-charge (OIC) sa San Fernando Police Station subay sa kamandoang giaprobahan niadto pang Pebrero 16 ning buwana.

Si Sr. Supt. Erson Digal, director sa kapulisan sa lalawigan sa Sugbu nimando gilayon kang Canlapan nga atimanon ang problema sa trapiko diha sa Minglanilla sulod sa duha ngadto na sa usa ka bulan.

Giklaro ni Digal nga ang pagkatangtang ni Baliguat nagumikan sa kapalpak niini pag-secure sa kadalanan sa Minglanilla dihang natanggong ang convoy ni Presidente Gloria Macapagal Arroyo atol sa pagtambong niini sa lubong ni kanhi Press Secretary Cerge Remonde.

Si Digal mimando kang Baliguat nga ipadayon usab niini nga pagpalambo sa peace and order sa Sta. Fe ug dakpon kadtong mga gikatahong mga anticrime groups nga magdala’g armas sa maong dapit. - Guam Logroño (BANAT NEWS)