Bogo ibutang sa watchlist?

CEBU, Philippines - Duha ngadto sa tulo ka barangay sa lungsod sa La Libertad, Negros Oriental ug siyudad sa Bogo sa amihanang Sugbo ang napanglantawan sa Commission on Elections (Comelec) nga ipaubos sa Election Watchlist karung umaabot nga eleksyon sa Mayo.

Si Atty. Rene Buac, regional director sa Comelec sa pakighinabi niini sa mga tigbalita kagahapon sa Police Regional Office-7 human sa ilang panagtigom tali sa kadagkuan sa militar ug kapolisan maoy mibutyag niini. Matud pa ni Buac nga subli siyang nagpatawag og tigom kagahapong adlawa aron hisgotan ang security situation dinhi sa Central Visayas sa umaabot nga eleksyon.

Hinuon giklaro niyang ang mga gikabalak-an dili pa gyud angayang seryosuhon sanglit ang kinatibuk-ang Central Visayas nagpabiling malinawon niining nagkaduol ang piniliay.

Apan giklaro hinuon ni Buac nga wala pa gyud sila'y insaktong mga lugar nga ilang ipaubos sa election watchlist dinhi sa Sugbu, apan iyang gipangtumbok ang amihanang bahin sa lalawigan, ug Negros nga mao karu'y ilang gitutukan pag-ayo. “Kinahanglan og special attention, but not actually yet, sa Cebu province itself dunay mga barangays nga ilang gibantayan nga posibleng init usab ang panaglabanay sa mga supporters nga ilang gipaluyohan,” matud pang Buac.

Samtang gipahibawo usab ni Buac nga karung Pebrero 6 adunay pagahimuong mock election diha sa barangay Pardo ning siyudad ug pagkasunod adlaw ipahigayon usab ang mock election sa usa ka bukirang barangay sa Cebu City North District.

Sa iyang bahin si PRO-7 chief Supt. Lani-O Nerez nagkanayon nga wala pa gyud nila ma-validate ang mga lugar dinhi sa Central Visayas lakip na ang Sugbu nga ilang ipaubos sa election watchlist sama kaniadtong milabay'ng eleksyon nga duna silay gihugtan gyud og bantay.

Apan siya nagtuong inig sugod na sa kampanya sa lokal anha na gyud nila mahibaw-an kinsang mga lugara nga angayan nilang ideklarar nga election watchlist tungod sa init nga panagbangi sa panagribal nga politiko.    (BANATNEWS)