CZECH Nat'l nang-hostage ug nagsunog

CEBU, Philippines - Usa ka Czech national nga gikatahong nanglungkab og balay, nang-hostage apan naghikog pinaagi sa pagsunog sa balay nga iyang gilungkab ug wala mogawas aron maapil og kasunog ang iyang kaugalingon.

Nahitabo kini kagahapon sa buntag sa sitio Sangi, barangay Cabcaban, lungsod sa Barili.

Ang Czech national giila sa kapolisan nga si Miloslav Frolisek, 52, ulitawo ug kasamtangang nanimuyo sa sitio Mahayahay, barangay Talo-ot sa samang lungsod.

Matud pa ni PO3 Job Sarvida nga mga pasado alas 5 sa miaging adlaw, si Frolisek mipugos pagsulod sa luyong bahin sa balay nga gipanag-iya ni Irene Fajardo, 25, pinaagi sa paglungkab sa bintana niini nga jalousy dala ang wala matinong kalibre sa armas ug kutsilyo.

Pasado alas 8 sa gabii, naabot ang igsuon ni Irene gikan sa dakbayan sa Sugbo nga si Igeane Fajardo kuyog sa higala niining si Marisa Hernandez. Apan pag-abot nilang duha sa balay ni Irene gi-hostage dayon sila ni Frolisek. Milanat og usa ka gabii ang pagpang-hostage ug pasado alas 6 na sa buntag sa dihang gibuhian ni Frolisek ang duha ka mga hostage. Apan si Ian Fajardo, igsuon ni Irene ug Igeane, mi-report sa kapolisan sa pagkahuman na sa hostage drama.

Ang kapolisan sa Barili nga pinanguluhan ni Chief Insp. Alexander Soledad miresponde sa nahitaboan ug maoy nakig-negotiate kang Frolisek aron motahan sa kapolisan.

Si Frolisek nakit-an sa kapolisan nga nagdaladala og tulo ka lamparilya nga puno og gas, kutsilyo ug armas.

Bisan sa negosasyon ni Chief Insp. Soledad, pakyas ang kapolisan sa paghangyo ni Frolisek nga motahan sa iyang kaugalingon.

Hinuon, mibahad si Frolisek nga daoban niya ang balay ug magpakamatay siya. Pipila ka minuto sa iyang pag-estorya sa ingon, giitsa ni Frolisek ang usa ka lamparilya nga nagsiga ngadto sa gawas hinungdan nga miulbo.

Wala magdugay, miulbo usab ang balay ug daling mikuyanap ang kalayo ug nadungog usab ang duha ka boto gikan sa sulod sa balay.

Ang kapolisan daling nanawag og bombero nga daling miresponde usab sa lugar nga nahitaboan hinungdan nga napalong ang kalayo.

Sa paglurang sa kalayo, didto nakita ang lawas sa Czech national nga si Frolisek nga nagbuy-od nga napagod ang kalawasan.

Mikabat sa P250 mil ang danyos nga gibilin sa sunog.   (BANATNEWS)