Naghikog lawas nadugta na

CEBU, Philippines - Gisuta pa sa kapolisan sa dakbayan sa Talisay ang hinungdan sa paghikog sa usa ka tawo didto sa sitio Candaya, barangay Linao dakbayan sa Talisay kansang lawas nag-anam na og kadugta.

Ang wala nay kinabuhing tawo napalgan kini sa miaging Domingo nga nagbitay sulod sa ilang balay ug giila siya nga si Dino Dasal, hingkod, lumad nga taga dakbayan sa Ilo-ilo apan temporaryong nagpuyo sa Linao.

Matud pa nila ni PO2 Erwin Denila ug PO1 Jun Dave David, mga operatiba sa homicide section sa Talisay Police Station nga si Dasal maoy caretaker sa maong panimalay nga gipanag-iya sa sister-in- law niini.

Ang biktima napalgan nga nagbitay nga gihiktan og electrical wire ang liog kansang pikas tumoy didto usab igaid sa hagdanan sa balay.

Matud pa sa kapolisan nga dugay-dugay na kining namatay kay nag-anam naman kadugta ang iyang lawas. .

Sa pagkakaron gisuta lang sa kapolisan kun wala bay foul play ang kamatayon ni Dasal. (Raymond D. Abarcas, UV Journalism Intern)    (BANATNEWS)