Sinulog 2010: Pacman imbitado sa Sinulog Grand Finale

CEBU, Philippines -  Giimbitar ni Cebu City Mayor Tomas Osmeña ang Filipino boxing icon nga si Manny “Pacman” Pacquiao nga mo-perform sa Sinulog 2010 human masayri sa mayor nga dili na mahinayon ang labing dako untang boxing bout tali kang Pacquiao ug Floyd Mayweather Jr. sa Marso.

Ang imbitasyon gipadangat sa mayor pinaagi sa iyang higala ug suod usab ni Manny nga si Rex “Wackee” Salud ug gipaabot nalang ang tubag niini.

Gusto sa mayor nga mo-perform ang People’s Champ sa grand finale sa Sinulog 2010 nga apilan usab sa inilang mga singer sa Sugbu nga sila si Dulce, Pilita Corales, ug ang igsuon ni Mat Ranillo III nga si Dandin Ranillo nga maoy nag-awit sa “Sinulog, Isyagit og Kusog” ug uban pa.“Maghuwat lang ta, mahimo man og moanhi siya in the last minute, sige na lang bisan one hour notice mahimo kaayo siyang maka-perform,” sumala sa mayor.

Ang mayor ug si Pacman nga gitawag usab og Pambansang Kamao nagkasuod tungod usab kang boxing patron nga si Wackee.Gani si Pacquiao maoy usa sa pinasidunggang dinapit ni Osmeña atol sa iyang ika-61 nga adlaw’ng natawhan niadtong Hulyo 26 sa miaging tuig.

Sa pikas bahin, giimbitar usab ang mayor atol sa ika-31 nga birthday ni Manny niadtong miaging Disyembre 17 sa General Santos City.

Gawas sa ilang panaghigala, giangkon sa mayor nga siya usa usab sa minilyon ka mga fans sa tibuok kalibutan nga nagsunod sa mga away ni Pacman.    (BANATNEWS)