2 ka tanod vs. polis; 1 patay

CEBU, Philippines - Usa ang patay samtang usa ang angol atol sa panag-engkuwentro sa duha ka mga tanod nga nanghagis ug nagpabuto sulod sa diskohan ug sa mga polis sa Tuburan nga miresponde sa alarma.

Nahitabo kini sa Purok II, barangay Macopa, lungsod sa Tuburan alas 11:30 sa miaging gabii.

Ang dead on arrival sa Tuburan District Hospital naila nga si Reynante Sampalad, 42, samtang ang iyang manghod nga si Janel, 16, naangol ug nalandig sa Vicente Sotto Memorial Medical Center.

Sumala pa sa report nga nadawat sa Operations Branch sa Cebu Police Provincial Office (CPPO) nga silang Reynante ug Janel kuyog sa ilang amahan nga si Bombito Sampalad, 42, ug uyoan nila nga si Rolando, 30, nga misulod sa gipahigayong disko sa Purok II. Silang Bombito ug Rolando pulos mga tanod sa barangay Macopa.

Sumala pa nga ang magsuong mga tanod gikatahong nanion sa mga tawo nga nanambong sa disko ug nagpabuto pa sa ilang mga armas hinungdan nga ang organizer nga si Ramil Lubanga nanawag kang PO1 Christopher Brigoli sa Tuburan Police Station.

Miresponde silang PO2 Bismarck Babiera, PO1 Christopher Brigoli, PO1 Pablo Arnoco, ug PO1 Joseph Sharon Esmero sa Purok II ug nakit-an ang magsuong Sampalad nga naglingkod sa pinutol nga kawayan sa gawas nga bahin sa diskohan ug nanag-inom.

Nakabantay ang magsuong mga tanod sa pag-abot sa mga polis hinungdan nga mibunot kini sa dala niining mga armas nga wala mahibaw-i ang klase ug kalibre, samtang si Reynante mition sa iyang .38 kalibre rebolber ngadto kang PO1 Esmero.

Misulay unta pagpusil si Reynante makaduha ka higayon apan wala mobuto ang rebolber hinungdan nga gipusil siya ni PO1 Brigoli gamit ang isyu niining M-16 rifle sa walang bahin sa hawak dayong katumba niini.

Ang manghod ni Reynante nga si Janel nga nakuwilyohan na unta ni PO1 Arnoco milugnot human nakakita sa iyang magulang nga nahapla ug mipunit sa rebolber ug mition ngadto kang PO1 Esmero.

Daling misinggit si PO1 Brigoli aron mapugngan si Janel apan wala kini manumbaling hinungdan nga napugos siya pagpusil kaniya sa walang bahin sa sampot.

Base sa pasiunang imbestigasyon nga ang upat ka Sampalad pulos mga hubog nga misulod sa diskohan ug usa ka Janel Kataliwan nga taga barangay Apalan, Tuburan ang mireklamong gitionan sa usa kanila.

Tungod sa presensiya sa mga Sampalad, nahukman sa mga organizer nga undangon ang disko apan nasuko ang duha ka tanod ug ang duha ka batan-ong Sampalad.

Ang mga Sampalad giingong nagpabuto sa dala nilang mga armas makadaghang higayon, samtang si Bombito miduol kang Lubanga ug mition sa iyang rebolber sa tuong bahin sa lawas niini.

Nakuha gikan ni Janel ang usa ka homemade nickel-plated 5-rounder nga .38 kalibre nga rebolber, tulo ka buhing bala ug tulo ka mga basiyo. Nakuha usab sa crime scene ang usa ka.38 kalibreng paltik nga rebolber, tulo ka buhing bala ug duha ka basiyo.

Ang tanod nga si Bombito kasamtangang natanggong sa detention center sa Tuburan Police Station samtang ang igsuon niining si Rolando nakaipsot ug padayon pa kining gipangita sa kapolisan.

Hayan mag-atubang sa patong-patong nga kaso ang maong mga tanod. - BANAT NEWS