17 tanod sa Toong gi-drugtest
CEBU, Philippines - Gipaubos sa kinalit nga drug test ang mga tanod sa bukirang barangay sa Toong ning dakbayan sa Sugbo kagahapong adlawa.
Kini human usab mohangyo ang kapitan sa maong barangay nga si Teotimo Bacalso ngadto sa buhatan ni Konsehal Augustus Pe Jr. alang sa maong katuyoan.
Nagduda ang kapitan nga dunay adis-adis sa iyang mga barangay tanod hinungdan nga kini iyang gipakalitan og drugtest kagahapon. Ang City Office for Substance Abuse Prevention (Cosap) pinanguluhan sa chairman niini nga si Felix Jose Lazarte maoy mipahigayon sa random drug screening test.
Gitataw hinuon ni Lazarte nga negatibo ang resulta sa 17 ka mga barangay tanod sa Toong nga gipaubos sa kinalit nga drug test.
“Sa 20 ka mga tanod, 17 ra ang napaubos nato sa drug test kay ang tulo layo kaayo ila, pero sa 17 pulos negatibo ang resulta,” sumala ni Lazarte.
Nagkanayon si Lazarte nga ang Toong maoy unang bukirang barangay sa siyudad nga ilang gipaubos sa drug screening test niining tuiga.
Niadtong miaging buwan, gipaubos usab sa Cosap sa random drug test ang 38 ka mga tanod ug clean and green worker sa barangay Guadalupe.
Duha ka barangay tanod ug duha ka sakop sa clean and green ang gikatahong napositibo sa paggamit og shabu atol sa nahisgutang drug test. – BANAT NEWS
- Latest
- Trending
