Petisyon sa P7.50 pletihan ipadali sa CITRASCO

CEBU, Philippines - Ang transport sector dinhi sa Sugbu miduso og mosyon nga naghangyo sa Land Transportation Franchise and Regulatory Board aron dalion ang pagdesisyon sa ilang petisyon sa pagsaka sa pletihan.

Si Ryan Benjamin Yu, pangulo sa Cebu Integrated Transport Corporation (CITRASCO) nagkanayon nga niadtong nakalabay’ng bulan milugak sila sa ilang petisyon nga pisong increase sa pletihan tungod kay maka-tolerate pa sila sa P36   matag litro sa krudo.

 Apan karong misaka na kini ngadto sa P37.31 matag litro gikinahanglan na silang moyangungo og   dugang pletihan pinaagi sa urgent motion diha sa LTFRB nga naghangyo nga dalion ang pagresulbar ang ilang dugang P1 nga pletihan.

Kun maaprubahan kini mahimo nang P7.50 ang minimum nga pletihan gikan sa P6.50.

Malaumon si Yu nga mosanong ang LTFRB-7 sa ilang petisyon nga P7.50 nga minimum nga pletihan sa PUJ tungod sa sunud-sunod nga pagsaka sa presyo sa lana ilabina dinhi sa nasud nga mas taas pa ikompara sa Manila.

 Apan pipila sa mga tinun-an ug bisan na ordinaryong sumasakay ang mireklamo nang di manukli ang mga drayber kun ilang hatagan og P7.

Sagad sa mga sumasakay dili nalang manumbaling sanglit naglikay og kasamok ug kahasol kun moreklamo sa buhatan sa LTFRB, pipila sa mga tinun-an mipadayag nga wala gihapoy nahimo ang LTFRB niini bisan paman sa kadaghan na sa mga reklamo.

Gikompirmar ni Yu nga dunay mga driver ang nangolekta og P7 nga plete ug kini gihulagway niyang illegal ug kinahanglang masilutan.

Apan gipasabot ni Yu nga wala sila makadawat og pormal nga reklamo gikan sa mga pasahero tungod kay gipasagdan na lamang ang maong hiwing binuhatan.

 Giawhag ni Yu ang mga pasahero nga katungod nilang mangayo og sukli ug kadtong amga drayber nga di motuman niini mahimong ireklamo ug masilutan.  - Chester Abadilla (BANAT NEWS)