Picture sa luna di mao

CEBU, Philippines - Giinsister ni Mandaue City Vice Mayor Carlo Pontico Fortuna ug Councilor Editha Cabahug ang Chairman sa Committee on Planning, Development and Social Housing sa Konseho sa dakbayan sa Mandaue nga sayop ang gipasabot nga yuta nga gitudlo ni Atty. Francisco Amit nga kabalhinan sa mga squatters diha sa barangay Paknaan dakbayan sa Mandaue.

Gipasabot sa duha ka opisyal nga walay lubi ug kamaisan sa maong dapit kay ang makita lang mga mangrove ug mga agukoy.

Matud pa ni Cabahug nga ang yuta nga gipasabot ni Amit mao ang utlanan sa yuta nga gipanag-iya ni Amado Ceniza nga tupad sa gikwestyong yuta nga diin kini (Amit) nagpahulagway.

Gumikan niini sa ikatulong higayon sa iyang pagbisita sa maong dapit gikuyog ni Cabahug ang mga tawong maoy ibalhin sa maong dapit ug mga sakop sa media aron masaksihan ang sitwasyon sa maong dapit.

“Pagtabang man kaha atong tuyo sa mga pobre ngano man nga adto man nato ibutang sa kuyaw gihapon nga lugar nga maabot gihapon sa tubig?” pangutana pang Cabahug.

Gibutyag usab sa konsehal nga dako kaayo ang pagmahal sa presyo sa maong luna kumparar sa pagkapalit niini ni Lua kang Felisa Chiongbian niadtong 2006.

Gipakita ni Cabahug ang “Deed of Absolute Sale” sa maong luna nga may gilapdong 65,820 metro kwadrado nga napalit ni Lua og P3 milyones lang.

 Apan human lang sa tulo ka tuig giingong paliton kini sa dakbayan sa kantidad nga 130 milyones ka pesos nga gihulagway nila ni Cabahug nga kahibulongan kaayong dali ang pagsaka sa appraisal value niini.

Hinuon giklaro ni Cabahug nga wala nila gikwestyon si Lua kabahin sa presyo ug ang ilaha lang mao ang pag-awhag kang Mayor Jonas Cortes nga hangyuon si Lua nga paubsan ang presyo niini kay mga kabus man maoy papuy-on dinhi. – BANAT NEWS