74 gambling machines giguba sa City Hall

CEBU, Philippines - Laing 74 ka unit sa video karera ug moli-moli machines ang gipangguba sa luyong bahin sa Cebu City Hall kagahapong adlawa.

Kini na ang ikaduhang higayon nga ang kagamhanan sa dakbayan nakadugmok sa maong matang sa illegal gambling machines niining tuiga.

Ang kapin sa P2 mil nga sinsilyo nga nakuha sa nahisgutang mga makina gidonar na ngadto sa Cebu City task Force on Street Children.

Kahinumduman nga niadtong miaging Abril 21, moabot usab sa 75 ka unit sa video karera ug moli-moli machine ang gipangguba diha sa City Hall.

Gibutyag ni Joling Lazarte nga sa kinatibuk-an, mokapin na sa dos mil ka unit sa video karrera ug moli-moli machine ang ilang nabungkag sukad gisugdan ang hinugtanay nga kampanya batok sa maong matang sa kahimanan sa illegal nga sugal niadtong tuig 2005.

Mokapin na usab sa tunga sa milyon ka pesos ang nahipos nga mga sinsilyo gikan niini nga gidonar ngadto sa mga charitable institution.

Gipadayag hinuon niining niminos na ang video karera ug moli-moli machine operation sa dakbayan tungod kay giingong pipila na lang ang mahipos sa kapulisan sa mga pagpangronda. Taliwa niini, nanawagan gihapon si Lazarte sa mga barangay officials sa dakbayan nga motabang pagpuhag sa video karrera ug moli-moli machine operations.

Una nang gipahibawo sa kapulisan nga nagpabilin pa ang operasyon sa maong mga illegal gambling machines sa pipila ka barangay sa siyudad.

Dunay mitumaw nga mga pagduda, nga ang mga barangay official ra mismo maoy niprotiher sa operasyon niini diha sa ilang dapit.   (Elly Bolonos)   (BANATNEWS)