Lakang ni Archival gisupak sa CPDO

CEBU, Philippines - Hugtanong gisupak sa Cebu City Planning and Development Office (CPDO) ang usa ka ordinansahon nga gipalabang ni konsehal Nestor Archival nga magpatuman sa mga probisyon sa Akta Republika 9266 kun ang Architecture Act of 2004 lakip na ang Implementing Rules and Regulations niini.

Basi sa maong ordinansahon ni Archival, katugotan na unya ang mga architect nga makapreparar sa plano ingon man sa specification.

Kini nagpasabot nga mahimong dili na kinahanglanon ang pirma sa usa ka civil engineer alang sa usa ka infrastructure project ug sa uban pang mga proyekto.

Apan matud sa labaw sa CPDO nga si Engr. Nigel Paul Villarete, dili mahimong aprobahan ang maong ordinansahon tungod kay gikwestyon pa ang balaud nga gibasihan niini. Gipadayag ni Villarete nga ang proposed measure nahasupak usab sa Akta Republika 544 (An Act to Regulate the Practice of Civil Engineering in the Philippines).

Midugang ang labaw sa CPDO nga nasukwahi usab sa kasamtangang organizational set-up sa Office of the Building Official (OBO) ang proposal ni Archival. Lakip na usab niini sa set-up nga gipatuman sa City Hall partikular na sa Department of Engineering and Public Works (DEPW) ug CPDO. Kini tungod kay ang City Engineer maoy moandam sa plano ug specification sa usa ka proposed project nga gikan sa buhatan sa mayor.

Subay niini, girekomendar ni Villarete nga isibog ni konsehal Archival ang iyang giduso nga ordinansahon sa City Council.

Kini samtang wala pa mahatagi og katin-awan ang collateral issues nga naglimin sa Akta Republika 9266 nga maoy gibasihan sa konsehal sa iyang sugyot. Atol sa gipahigayong public hearing sa ordinansahon ni Archival, nag-iyahay og pangatarungan ang supak ug pabor sa nahisgutang panukdanan.  - Elly Bolonos (BANAT NEWS)

Byron lipay sa pagsaka sa koleksyon sa terminal

CEBU, Philippines - Si Capitol consultant Byron Garcia pangulo sa operasyon sa Cebu South Bus Terminal mibutyag kagahapon nga puwerting lipaya niya nga mikita na og P315 mil ang maong terminal hangtod niadtong Septiyembre 15 niining tuiga , human buksi ang gibag-o nga terminal.

Kini tungod kay may 300 ka mga minibus ug bus ang mo-parking matag adlaw sa maong terminal nga nahimutang sa Natalio Bacalso Avenue unya magbayad kini og tag P100 sa matag sulod nila sa maong terminal, unya matag usa ka pasahero nga mosulod sa maong terminal pabayron usab og tag P5 matag usa.

Sumala pa ni Garcia nga ang maong sistema maoy kabahin sa ilang modernong pangalagad sa tanang mga sakyanan nga mo-parking ug sa mga pasahero nga magpaabot og mga sakyanan paingon sa habagatan. Midugang si Garcia nga puwerting lipaya niya kay wala siya magdahum nga karon lang buwana Septiyembre mikabat og P30 mil ang kita sa maong terminal. - Rey B. Pasaporte (BANAT NEWS)