Presidentiable's gisaway ni Dakay

CEBU, Philippines - Gisaway sa tigpamaba sa Arsobispo sa Sugbu Monsenyor Achilles Dakay ang pipila ka presidentiables nga miatras sa ilang tinguha sa 2010 elections.

Dismayado si Dakay tungod kay gusto niining daghan ang mokandidato sa umaabot nga eleksyon aron dunay daghang kapilian ang katawhan.

 “Kadto bang namahayag nga dunay mga programa nga sila ray makasulbad sa problema sa nasud hain na man ang ilang prinsipyo, nganong nikuyos man,” sumala ni Dakay.

Una nang misibog si Senador Mar Roxas sa iyang tinguha nga mag-presidente uban sa pagpahibawo sa iyang kaandam pagpaluyo kang Noynoy Aquino nga iyang kapartido.

Dili na usab interesado si Gobernador Ed Panlilio sa Pampanga nga magpapili sa labing taas nga posisyon sa nasud uban usab sa pag-itsa og suporta ngadto kang Noynoy.

Apan wala palabya ni Dakay ang iyang pagsaway ngadto kang Panlilio nga usa usab ka pari sa gipahibawo niining pagsibog sa presidential race.

“Modagan siya isip pari kay siya ra kunoy makasulbad, way laing layman nga makasulbad sa problema, unya karon mobalik na sab siya pagka-pari, lain sab nang iya,” matud ni Dakay.

Lakip usab sa gisaway ni Dakay si Noynoy nga padayon pang nangunsulta ug nangayo og lamdag alang sa plano sa politika niini sa 2010 elections.

Ang wala higustuhi ni Dakay sa anak ni kanhi presidente Cory Aquino, mao ang pagkonsulta sa katawhan ingon man ang gihimo niining spiritual retreat.

“Let him run kay ang mga tawo may mobutar, dili kay mananghid pa sa mga tawo nga modagan ba o dili, mananghid pa sa Ginoo kung modagan ba o dili, maayo man og mobutar nang Ginoo nga dili man,” dugang pamahayag ni Dakay.

Gihulagway karon ni Dakay si Noynoy nga nasusama sa usa ka tabanog nga gisigehan og tugpo sa mga tawong walay laing lingaw. – BANAT NEWS