Batan-ong may 14 ka linikit marijuana tiklo

CEBU, Philippines - Usa ka 17 anyos nga tinun-an sa publikong tulunghaan sa high school sa lungsod sa Consolacion nasakmitan og 14 ka pakiteng pinaugang dahon sa marijuana atol sa buy bust operation sa kapolisan didto sa barangay Looc, dakbayan sa Consolacion niadtong miaging hapon.

Ang dinakpan nga gitanggong karon sa kapolisan sa nahisgotang lungsod gitakdang itugyan usab ngadto sa Department of Social Welfare and Services Development (DSWD) sa maong lungsod.

Si PO3 Lito Dinampo sa nahisgotang kapolisan sa Consolacion mibutyag sa Banat News nga si Bebie, dili tinuod nga ngalan, dugay na nilang gipanid-an ug dihang nasuta nila ang pagnegosyo niini og ilegal nga drugas, mipahigayon dayon sila og buy bust operation ug didto nasakmit nila ang 14 ka pakiteng pinaugang dahon sa marijuana.

Matud pa ni PO3 Dinampo nga ang suspetsado nagpahayahay na karon sa ilang prisohan samtang gihikay na usab ang kasong may labot sa paglapas    sa Republic Act 9165 kon Comprehensive Dangerous Drug Act of 2002. - Romeo T. Limpangog (BANAT NEWS)