Sistema sa edukasyon palambuon

CEBU, Philippines - Aron pagpalambo sa sistema sa edukasyon dinhi sa Pilipinas ang Department of Education inabagan sa nasud sa Australia molusad sa Training and Development System.

Kini gipahibalo ni DepEd Secretary Jesli Lapus atol sa pagbisita niini sa DepEd-7 niadtong adlaw’ng Biyernes atol sa pagbukas sa Dormtel sa Ecotech Grounds inubanan sa Australian Acting Minister Counselor for Development Cooperation nga si Peter Jensen.

Sumala pa ni Jensen, ang Australian grant nga nagbalor og 20 million Australian Dollars dako og matabang sa sistema sa edukasyon dinhi sa nasud partikular na ang pagpalambo sa kinaadman sa mga magtutudlo, trainings, information system ug uban pa.

Si Lapus namahayag nga kaniadto langay kaayo ang pagtapok sa mga importanteng impormasyon kabahin sa sitwasyon sa matag tunghaan sa nasud.

Matud pa ni Lapus nga ilusad unya nila ang ‘blueprint’ o roadmap alang sa pagpalambo sa edukasyon sa nasud kini sama sa Basic Education Information System, Resource Management and Development System ug Training Development System.

Pinaagi sa maong mga sistemang ipatuman sa DepEd ang tanang mga tunghaan duna nay sundong standard alang sa ilang reporting ngadto sa kaulohan ug niining paagiha updated na ang DepEd sa mga panginahanglan sa mga tunghaan sama sa mga gikinahanglang bangko, magtutudlo, trainings, libro ug uban pa.

“What will take months ago will be done in days,” matud pang Lapus.

Samtang giklaro ni Lapus nga kung makumpleto na ang information system sa DepEd diha palang sila mangangkong 100 porsiyento nang na-edukar ang kabataan sa nasud tungod kay hangtud karon duna pa gihapoy mga dapit nga may kakulangon sa mga tunghaan ug uban pa.

“We are launching some of the more important and lasting management tools for DepEd. Secretaries of DepEd come and go but how can we be assure of the continuity of the program,” matud pa niini ug mipasabot nga pinaagi niining maong blueprint masiguro gyung magpadayon ang target sa DepEd.

Si DepEd-7 regional director Recaredo Borgonia nagkanayon nga gipaninguha nila karon sa rehiyon nga mapatuman ang maong mga plano sa tuyo nga mapalambo pa ang edukasyon sa taga Visayas. (Edwin Ian Melecio)   (BANAT NEWS)