P6.2 milyones nga alahas gisakiyo sa mga tulisan

CEBU, Philippines - Arestado ang upat ka mga tulisan nga gidemalas ug nangadakpan kinsa minutos human nila tulisa ang usa ka jewelry dealer nga nagdala og balor P6.2 milyones nga alahas kagahapon sa hapon diha sa barangay Punta Prinsesa.

Ang nadakpan giilang sila si Jeromy Polistico, 34, taga Clarin, Misamis Oriental; Noel Davis, 44, taga Ludo Subd. sa barangay Panabo Davao City; Frederick Ybañez, 38, taga Ozamis City ug ang gitumbok nga local contact nilang si Kirby Abanilla, 25, taga barangay Pasil sa dakbayan sa Sugbu.

Ang upat na-intercept sa mga mirespondeng mga sakop sa Punta Prinsesa Police Station pinanguluhan ni Sr. Insp. Gilberto Abellar.

Ang upat mitulis sa biktimang si Jennifer dela Cerna, nga taga barangay Bulacao ning dakbayan kinsa nag-deliver unta sa maong mga alahas sa iyang dugay nang babayeng kliyente.

Matud pa ni dela Cerna sa pakighinabi sa Banat News nga nianang alas 12 sa udto gitawgan siya sa iyang kliyenteng babaye nga dunay mo-order og mga alahas nga mga taga Bureau of Internal Revenue ug taga Talisay.

Tuod man gihatud niya ang maong alahas ngadto sa ilang gikasabutang dapit apan pagkaalas 2 sa hapon gitawgan siya niining ipakuha og balik ang mga alahas kay nakalakaw na ang mga mi-order.

Apan human mauli sa iyang kliyenteng higala ang mga alahas milakaw kini dayon, sa dihang mobiya na siya sa kan-anang ilang giabtan kalit nga miabot ang usa ka itom nga Toyota Adventure nga may duha ka armadong lalaking mikanaog ug mition kaniya og armas dayong bunlot sa iyang bag.

Ang sakyanan milahos sa may Punta Prinsesa apan swerteng dunay sibilyang nagmotorsiklo nga nakasunod ug dihang naagi sila sa Punta Prinsesa ilang gipahibalo ang nahitabo.

Ang mga suspek natanggong sa traffic diha sa may Tres de Abril ug dihang ilang nabantayang miabot ang mga polis ilang gibiyaan ang sakyanan ug nanagan sa Victor Village 1 sa barangay Punta Prinsesa.

Ang upat naabtan sa mga polis nga nagkabuwag-buwag apan wala na mosukol sumala pang SPO4 Gualberto Oroc kinsa maoy nakapasalba kaduha ka higayon sa mga suspek.

Narekober ang gibana-banang napulo ka mga alahas nga may mga adornong diyamante, kwartang P20 mil nga cash ug ang usa ka kalibre .38 rebolber, duha ka .45 kalibreng pistola, tulo ka magazine nga puno og bala ug ingon man 12 ka bala sa .38.

Narekober usab ang Toyota Adventure nga itom nga may plakang ZBW-867 nga kasamtangan na karong gisubay kung si kinsay tag-iya, upat ka dagkong knapsacks, upat ka plastic bags, mga pitaka ug uban pa.

Si Sr. Supt. Patrocinio Comendador, director sa Cebu City Police Office mibutyag nga Mindanao Robbery Group ang grupo ug si Abanilla ang ilang kontak dinhi. – BANAT NEWS