Cebu City nagplano og housing program sa senior citizen

CEBU, Philippines — Gipanglantawan sa Cebu City Council ang pakig-alayon sa pribadong grupo aron sa paghatag og housing program sa mga senior citizen.

Kini human nibutyag ang Division for the Welfare of the Urban Poor (DWUP) nga dili sila kwalipikado.

Nipahibawo ang community specialist ug Barangay Quiot Coordinator Ann Marie Acebedo atol sa executive session niadtong Miyerkules sa ilang mga lakang sa paghatag og relocation sites sa mga apektadong pamilya sa demolisyon.

Atol sa diskusyon nabutyag nga adunay age requirement aron malakip sa relocation site sa city government.

"If ever, senior citizen na sila, pwede ilang mga anak ang mo claim", matud ni Acebedo.

Nahisgotan usab kini sa minority floor leader Konsehal Nestor Archival, Sr. nga usa ka senior citizen sa Barangay Talamban ang niduol sa iyang opisina ug nagpahibawo nga dili kini kwalipikado sa bisan unsang government assistance human mawagtangan og balay tungod sa demolisyon.

"Tan-aw siguro sa gobiyerno nga kini tiguwang na ni, di na ni kabayad", matud ni Archival.

Sa iyang bahin, si Acebedo nagkanayon nga makahatag og financial assistance ang gobiyerno sa mga senior citizen apan wala malakip ang relocation sites tungod kay aduna kini bayronon.

Giklaro ni Acebedo nga kinahanglang ma-coordinate kini nga isyu sa Department of Social Services (DSWS).

“Kay kong tiguwang na ka, di ka maka-avail sa housing program sa gobiyerno kay bayaran man gud na ang lote og hinay-hinay, naay certain number of years, naay kontrata nga himuon", ni Acebedo pa.

Ang presiding officer nga si Konsehal Dondon Hontiveros nisugyot nga kong mamahimo makagama og home for the aged ang mga magbabalaod kinsa si Archival niuyon niini.

"Mao nay dako nga question karon kay ang senior citizens ato ganing gitagaan og financial assistance but kong sa pabalay na murag mahabilin sila", matud ni Archival.

Samtang si Acebedo nisugyot nga makig-coordinate ang gobiyerno sa ubang ahensiya sa pag-umol og sestema alang sa mga senior citizen.

Gihisgotan usab ni Acebedo ang mga uwahing demolisyon sa Sitio Gimelina sa Barangay Quiot Pardo diin usa ka temporary holding area ang gipahimutang.

Nasayran nga ang ubang mga apektadong residente nibalhin kini sa ilang mga pamilya.

Dugang ni Acebedo nga kinahanglan nilang mosumitir og rekisitos sa DWUP ug makakuha niini ang anaa sa 51 ka pamilya sa Sitio Gemelina diin10 sa mga apektadong pamilya ang nipili sa pagkuha nalang og financial assistance nga P28,000 gikan sa Cebu City Government. — /BDB (BANAT NEWS)