Pichay misaad P48-M alang sa water district sa D'bantayan

CEBU, Philippines – Misaad si Prospero “Butch” Pichay, chairman sa Local Water Utilities Administration og P48-milyones alang sa operasyon sa Daanbantayan Water District.

Kini sumala pa sa gipahibawo ni Kong. Benhur Salimbangon sa ikaupat nga distrito sa lalawigan sa Sugbo diin nahisakop ang lungsod sa Daanbantayan.

Si Salimbangon kuyog sa mga opisyales sa lungsod sa Daanbantayan nga gipanguluhan nilang Mayor Sun Shimura ug Bise-Mayor Malou Loot sa ilang pagbisita sa buhatan sa LWUA sa kauluhan dili pa lang dugay.

Tuyo sa ilang pagpakigtagbo kang Pichay ang pagsusi sa matabang sa iyang buhatan aron hingpit na nga makasugod sa operasyon ang DBWD.

Suportado ni Salimbangon ang maong proyekto hinungdan nga siya mismo ang nangita og paagi nga makakuha og ayuda gikan sa nasudnong ahensiya sanglit mao usab kini ang usa sa iyang tumong ang pagbutang og patubig sa tibouk distrito.

Sayo niini gikataho nga ang mga kasamtangang waterworks system sa kabarangayan sa lungsod sa Daanbantayan kuhaon na unya sa water district.

Apan giklaro ni Salimbangon nga sayop ang maong mikatap nga taho nga nakapasuko sa tagdumala sa mga water systems.

Matud pa ni Salimbangon nga mo-operate sa iyang kaugalingon nga water district nga suportado sa kagamhanan ug pasudlan niini og patubig ang tanang dapit lakip na kadtong duna na’y patubig sa pagkakaron.

Gidugang ni Salimbangon nga sa higayon nga maalkanse na ang mga water system, andam ang water district sa pagdawat kun kinsa nga water system ang dili na makasagubang sa ilang operasyon. – Gregg M. Rubio (BANAT NEWS)