4 patay sa pinusilay sa talisay

CEBU, Philippines – Upat ka tawo ang namatay usa niini kagawad sa barangay ug lider usab sa Alima-ong ug duha ang giingong naangol sa nahitabong pinusilay ug dinunggabay atol sa gipahigayong variety show sa bisperas sa pista niadtong Biyernes sa gabii sa barangay Maghaway, dakbayan sa Talisay.

Patay diha-diha sila si Pedro Delvo, 51, kagawad sa nahisgutang barangay ug lider sa Alima-ong; Jonifer Villacencio, 24, residente sa lugar apan lumad nga taga barangay Begahon, dakbayan sa Toledo; Melchor Tabay, 19, residente usab sa lugar samtang si Alex ‘Nonoy” Murallos, umagad ni Delvo wala na makaabot nga buhi sa Vicente Sotto Memorial Medical Center.

Ang naangol mao si Felix Abacahan Jr., 29, tanod sa nahisgutang barangay human mapusili sa tiyan, duha sa tuong paa ug gidala sa VSMMC, samtang duna pay usa ka wala mailhing biktima ang giingong natapsingan.

Si Delvo nakaangkon og samad dinunggaban sa ubol-ubol ug maayong pagkaguba sa nawong niini human dakdaki og dakong bato.

Si Villacencio ug Tabay ang parehong nakaangkon og samad pinusilan sa walang bahin sa ilang mga dughan samtang si Murallos ang nakaangkon og samad pinusilan sa tuong bahin sa ulo.

Apan hangtud ning pagsulat sa balita gisubay pa sa kapolisan kung unsa ang nahitabo gawas sa impormasyong giingong si Delvo ug Abacahan duna nay panagbangi tulo na ka tuig ang nakalabay.

Si Supt. Henry Binas, hepe sa Talisay City Police Station sa pakighinabi niini sa Banat News nagkanayon nga napusilan si Delvo kaniadto ug iyang gidudahang may kalambigitan niini kaniadto si Abacahan.

Niadtong Biyernes sa bisperas sa pista sa barangay nianang pagkagabii dunay gipahigayong variety show duol sa barangay hall ug nagkaabot sila si Delvo ug Abacahan.

Si Delvo kuyog ni Murallos samtang si Abacahan kuyog nila ni Villacencio ug Tabay nianang tungora, sa wala pa hisayring hinungdan giingong kalit nga mipaka-paka ang buto sa armas.

Gumikan niini nagkatibulaag pagdagan ang mga nanan-aw ug ang uban ang nanglayat apil na ang mga performers sa variety show tungod kay kilid ra gyud sa entablado ang pinusilay.

Wala pay testigos nga mipatim-aw paghatag og pamahayag sa sinugdanan sa hitabo kini bisan paman nga daghang mga tanod nga nagbantay ug daghang mga tawong mitambong sa maong kalingawan.

Gumikan niini gimando ni Biñas nga ipa- paraffin test ang tanang tanod nga mi-duty nianang gabhiuna.

Na-recover sa mga polis gikan sa posisyon ni Delvo ang usa ka kalibre .45 nga pistola nga dunay usa ka magazine nga dunay sulod nga upat ka buhing bala ug usa ka magazine sa Ingram nga dunay 16 ka buhing bala sa 9mm pistol.

Gikan sa bulsa ni Villacencio na-recover usab ang usa ka magazine sa kalibre .45 nga dunay sulod nga lima ka buhing bala.

Ang mga polis ang naka-recover usab og unom ka buhing bala ug siyam ka kabhang sa kalibre .45 nga pistola, duha ka walay sulod nga magazine sa kalibre .45, usa ka Ingram sub-machine gun ug usa ka sakuban sa kutsilyo diha sa crime scene.

Ang imbestigador nga si PO2 Lino Diez nagkanayon nga posibleng pulos armado ang mga nalambigit sa pinusilay tungod kay ang tulo ka magazine sa kalibre .45 nga na-recover pulos di mosakar sa pistola nga na-recover gikan sa patay’ng lawas ni Delvo.

Gituohang duna pay tulo ka kalibre .45 pistolang gigamit sa maong krimen nga gidala sa wala mailhing mga tawo atol sa kaguliyang.

Usa ka duha ka kilong bato ang nakuha usab diha sa dapit nga gituohang gigamit pagdakdak sa ulo ni Delvo. – BANAT NEWS