2 ka 6-anyos gi-molestiya

CEBU, Philippines - Duha ka 6-anyos nga   batang lalaki gikatahong gimolestiya sa ilang silingan nga bayot nga nagpanuigon og 38-anyos niadtong milabay'ng semana sa usa sa mga bukirang barangay sa dakbayan sa Talisay.

Niadtong Biyernes usa sa mga biktima kinsa uban sa iyang inahan midangop sa Talisay City Police Station Women and Children’s Protection Desk.

Niadtong Martes sa buntag, ang laing biktima kinsa uban usab sa iyang inahan   mitaho ngadto kang SPO1 Margienett Yosores kinsa maoy Women and Children’s Protection Desk investigator.

Base sa imbestigasyon ni SPO1 Yosores nga ang maong mga bata niadtong Marso 20, 2009 sa buntag   miadto sa balay sa ilang silingan nga bayot.

Ang suspetsado nagtrabaho isip yaya sa batang lalaki nga nagpanuigon usab og 6-anyos nga classmate sa duha ka biktima.

Ang duha ka biktima   giingong gihaylo nga hatagan og pan sa bayot human niini og duwa sa ilang mga kinatawo.

Apan matud sa maong mga bata nga human og duwa sa bakla sa ilang mga kinatawo wala sila hatagi og pan niini hinungdan nga namauli na lang sila sa ilang mga balay.

Matud ni SPO1 Yosores nga nahibaw-an ang gibuhat sa suspetsado ngadto sa mga biktima sa dihang ang mga bata nagreklamo nga sakit ang ilang kinatawo kun mangihi sila hinungdan ang mga inahan niini misukit-sukit kanila.

Base usab sa imbestigasyon ni SPO1 Yosores nga ang mga biktima mitug-an ngadto kaniya nga ang maong insidente dili lang unang higayon nga nahitabo tungod kay kanunay na silang molestiyahon sa suspetsado ug haylohon lang silang hatagan og pan ini’g ka human. (BANAT NEWS)