Kurakot, kawatan sa gobiyerno gukdon

CEBU, Philippines - Gilusad kagahapong adlawa sa Office of the Ombudsman Visayas ang “Oplan Huli Ka” dinhi sa siyudad sa Sugbu nga tumong nga panakpon ug ibulgar ang mga kurakot nga mga kawani ug opisyal sa gobiyerno.

Gipirmahan kagahapon ang Memorandum of Agreement (MOA) tali sa Office of the Ombudsman for the Visayas ug ingon man sa Philippine National Police (PNP); National Bureau of Investigation (NBI) ug lakip sa usa ka non-governmental organization nga “Ehem!Aha!” network.

Tuyo niini mao ang pag-organisa og ‘whistleblowing’ network nga tumong mao ang pagbulgar sa mga kawatan sa gobiyerno.

Si Ombudsman Merceditas Gutierrez nga gipaabot nga maoy mosaksi sa launching ug pinirmahay sa MOA wala makatunga.

Atol sa MOA signing ang team leader sa “Ehem!Aha!” nga si Rev. Father Albert Alejo nagkanayon nga mas maayo untang matinud-anon ang Ombudsman Visayas sa ilang kampanya batok sa kurapsyon ilabi na sa ilang imbestigasyon sa decorative lampposts.

Kini gumikan sa kalambigitan sa mga dagkong opisyal sa Department of Public Works and Highways (DPWH) ug ingon man ang duha ka mayor sa dakbayan sa Mandaue nga si Thadeo Ouano ug Lapulapu nga si Mayor Arturo Radaza nga pulos naabswelto.

Si Atty. Medardo de Lemos, regional director sa NBI-7 ug ingon man si Sr. Supt. Melvin Buenafe, pangulo sa Regional Intelligence Division sa PRO-7 kinsa maoy ni-representar kang PRO-7 director Chief Supt. Federico Terte mipadayag og suporta sa maong kampanya.

Samtang si deputy ombudsman Pelagio Apostol nagkanayon nga dako iyang pagtuo nga magmalampuson ang maong kampanya sanglit gilangkoban kini sa mga ahensya sa gobiyerno ug non-governmental organization.

Si Apostol miawhag sa publiko nga motabang sa maong kampanya aron mapuo ang mga kawatan sa hut-ong sa gobiyerno ug aron usab mausab ang pagtan-aw sa ubang nasud sa gobiyerno sa Pilipinas nga usa sa labing kurakot sa tibuok kalibutan. - Rey Pasaporte uban sa report ni Chester Abadilla (BANAT NEWS)