Natagak sa lubi namatay

CEBU, Philippines - Nagsugod na og panimaho ang patay'ng lawas sa usa ka mananggiting gituuhang pipila na ka adlaw nga natagak ug namatay diha sa gisanggotan ug niadto lang Biyernes sa alas 10:00 sa buntag nakit-an sa sitio Cang-igang barangay Sorsogon lungsod sa Malabuyoc.

Patay nang nakit-an si Jesus Alloso, 49, molupyo sa nahisgutang lugar kansang patay'ng lawas gituuhang nakaangkon og daghang mga bali nga nakaingon sa iyang kamatayon.

Matud ni PO1 Camilo Zapra sa Malabuyoc Police dihang nahinabi sa Banat News ang anak sa biktima nga si Jimbreac, 22, nagkanayon alas-10 sa buntag niadtong Biyernes iyang nakit-an niyang nagbuy-od sa tiilan sa lubi ang amahan.

Sumala pa sa anak nga niadto pang Miyerkules sa gabii kini nibiya sa ilang panimalay ug wala na mobalik hinungdan nga gi-report dayon sa kabanay sa barangay nianang pagka-Huwebes sa buntag.

Ang mga silingan misiksik sa mga dapit diin posibleng miadto ang biktima apan natapos nalang ang maong adlaw wala kini makit-i ug nianang pagka adlaw'ng Biyernes sa buntag na kini nakit-an.

Subay sa gipahigayong autopsy sa municipal doctor sa maong lungsod wala kini nakitang timailhan nga dunay foul play ang maong panghitabo.

Gituohan hinuon sa doctor nga natagak ang biktima gikan sa taas nga bahin sa lubi niining gisanggotan ug mao kini hinungdan sa iyang pagkamatay. - BANAT NEWS