Usa ka pamilya nalanag sa manok

CEBU, Philipines – Tulo ka mga bata lakip ang ginikanan ang gituohang nangalanag sa gikaong litsong manok nga pinalit sa usa ka tindahan sa Patalinghug Avenue sa barangay Pajo dakbayan sa Lapulapu sa milabayng adlaw.

Ang nangalanag giilang sila si Jennifer Lumongo, 28 (inahan), Jonifer Lumongo, 30 (amahan) ug mga anak nilang sila si Joffel 6, Jenny May 5 ug Jenny Ley 1 pa ka tuig pulos mga residente sa sitio Camansi sa barangay Pajo dakbayan sa Lapulapu.

Sa pamahayag ni Jonifer (amahan) ngadto sa Banat News niadtong Domingo mga 1:30 sa kaadlawon mipalit siya og duha sa litsong manok sa Androks nga namaligya og litsong manok nga nahimutang sa maong dapit gumikan kay nagsaulog kini sa iyang adlaw nga natawhan.

Apan mga alas 9:30 sa buntag sa susamang adlaw uban sa tibuok pamilya iyang gidala sa dagat aron magsaulog ug mangaligo ang mga bata maoy ilang gibalon pinalit nga manok ug ang kan-on nga ilang giluto.

Dihang nabalik na sila sa ilang balay nahibulong nalang ang inahan nga kalit nagsukasuka ug nagkalibang ang iyang 6-anyos nga bata ug milagom.

Mao usab ang nahitabo 5-anyos nga bata ug sa kinamanghurang anak ug dayon ang inahan hinungdan gidali sila pagdala niini ngadto sa tambalanan sa Lapulapu District Hospital.

Matud pa ni Lumongo atol sa ilang pagkaon sa litsong manok wala sila makamatikod nga pan-os na ang maong pagkaon apan ang ilawom nga bahin niini aduna pay dugo nga makita hinungdan nga iya kining gisugba sa usa ka sugbahanan sa maong resort nga ilang gikaligoan.

Dako ang pagduda sa banay nga nalanag sila sa napalit nilang litsong manok apan sa pakighinabi sa Banat News kang Glen Alcantara, tag-iya sa Androks hugot niyang gihimakak nga sa ilang tindahan nakapalit si Lumongo gumikan kay sayo silang nanirado.

Apan bisan paman alegasyon lang kini mipadayag si Alcantara nga tabangan niya sa gikinahanglanon sa tambalanan ang pamilyang Lumongo apan miklarong wala kini magpasabot nga miangkon kini sa pasangil.

Samtang hangtod ning pagbalita ang mga sakop sa kapolisan sa dakbayan sa Lapulapu naghuwat kini sa resulta sa laboratory test sa nahibiling manok kung aduna ba kiniy kalambigitan sa pagkalanag sa pamilyang Lumongo. (Bong Soriano) (BANAT NEWS)