Cordova himuong first class municipality

Cebu - Ang paghimong first class municipality sa lungsod sa Cordova maoy damgo ni Cordova Mayor Adelino "Addy" Sitoy sa iyang State of the Municipal Address (SOMA), atol sa iyang pagsaulog sa ika 73 nga adlaw’ng natawhan kagahapon.

Atol sa maong SOMA, gipahayag sa mayor ang mga dagkong kausaban sa Cordova sulod sa duha ka tuig niyang pagdumala sa maong lungsod.

Matud pa ni Sitoy nga usa sa mga kalamboan sa Cordova ang 13 porsentong pagsaka sa kinitaan niini sa miaging tuig diin ang katibuk-ang kantidad mikabat sa P13,447,120.24, kun itandi sa P11 milyones kapin sa tuig 2007.

Gawas sa mga basic services nga nahatag sa kagamhanang lokal sa lungsod sa Cordova ngadto sa mga molupyo niini, si Mayor Sitoy nagplano nga palapdan ang ilang "land area" og 4 mil ka metro kuwadrado diha sa iyang "Foreshore lands" sa palibot sa Cordova.

Maoy tinguha sa mayor nga mapadak-an usab ang ilang Internal Revenue Allotment o IRA.

Matud pa ni Sitoy nga sa milabay’ng tuig mikabat lamang sa P42.9 milyones ang ilang IRA ug kung mapalapdan na ang ilang land area unya mobaha ang nagkalainlaing mga proyekto niini, hayan labi pang mosaka ang ilang IRA hangtod nga makab-ot niini ang iyang gipangandoy nga mahimong sama sa usa ka First Class Municipality ang Cordova.

Gibutyag sa mayor nga adunay umaabot nga mini- hospital sa Cordova nga usa sa mga proyekto nga tukoron sa mga Koryano, may tukoronon usab nga world class nga golf course, ang multi billion pesos nga kantidad sa tulay nga magkutay sa lungsod sa Cordova ug sa lungsod sa Getafe, lalawigan sa Bohol.

Ang katumanan sa Cordova Public College nga makonberter ngadto sa pagka- Cordova State College of Science and Technology usa usab sa makatabang og dako sa kalamboan sa lungsod.

Gumikan sa maong mga kalambuan, nanghinaot si Mayor Sitoy nga mokwalipikar na kini sa pagkahimong first class municipality. - Bong Soriano (BANAT NEWS)