Ulitawo giluba sa diskohan

CEBU - Kritikal ang kahimtang karon sa usa ka ulitawo kinsa giluba sa wala hiilhing kriminal didto sa usa ka diskohan sa dalan Juan Luna, Poblacion, Danao City niadtong miaging kaadlawon.

Ang biktima giila sa kapolisan nga si Jonathan Pasahol Jr., 19 anyos, ulitawo ug walay trabaho, nga taga Sitio Highway, Barangay Looc sa maong dakbayan.

Sumala sa kapolisan nga nalingaw ang biktima sa pagtan-aw sa mga nanayaw sa disko dihang usa ka tawong dili niya kaila ang kalit lang miduol ug mihansak og kutsilyo sa iyang dughan.

Human maigo ang biktima, misirit usab dayon ang kriminal pahilayo sa maong dapit samtang ang biktima gihatod usab dayon ngadto sa Vicente Sotto Memorial Medical Center sa Cebu City aron sa pagsalbar sa iyang kinabuhi. – BANAT NEWS