Panday gipusil ug gitigbas patay

CEBU - Patay dihadiha ang usa ka panday nga gipusil ug gitigbas pag-unay sa iyang pag-umangkon didto sa Barangay Lower Langin, lungsod sa Ronda niadtong Miyerkules sa buntag.

Ang biktima nailhan nga si Genaro Antipuesto, 54 , biyudo, ug usa ka panday nga taga Lower Langin, samtang ang suspetsado nailhan usab nga si Mario Omboy, hingkod, nga pag-umangkon sa biktima.

Base sa imbistigasyon sa kapolisan nasayran nga ang biktima nagpanday sa balay sa iyang manghod nga si Melecio Antipuesto ug kauban niya si Ariel Antipuesto nga usa usab niya ka pag-umangkon nga nagtaod og trasses sa balay.

Dihang kalit lang miduol si Omboy ug dayong pusil ngadto sa biktima ginamit ang air gun ug naigo ang dapit sa ilok sa biktima.

Samtang samdan, nanaog ang biktima ug midagan kini pahilayo sa gipanday niyang balay apan natumba kini sa unahan.

Ang suspetsdo nga wala matagbaw giusban pa gyud pagpusil ang biktima ug naigo na usab kini sa walang bahin sa dunggan nga milapos ang bala sa tuo niyang aping.

Apan nakadagan pa gihapon ang biktima nga nakapalagot pagsamot sa suspek hinungdan nga milanit na usab kini sa iyang sundang ug gitigbas ang bagolbagol ug bukobuko sa biktima nga maoy hinungdan sa kamatayon niini.

Dihang nakita sa suspek nga dili na mabuhi ang biktima, mibiya kini sa lugar ug wala na gyud mopakita sa ilang dapit.

Si PO3 Christopher Bani mibutyag sa Banat News nga sa pagkakaron padayon pa nilang gipangita ang suspetsado aron kapasakaan og kaso. (BANAT NEWS)