Nasunogan gitabangan sa TFF

CEBU - Mga biktima sa sunog diha sa sitio Lupa sa barangay Basak-San Nicolas ang gihatagan og hinabang sa The Freeman Foundation kagahapong adlawa.

Ang operasyon gipanguluhan ni TF Foundation administrator Dr. Remedios Bacasmas ug The Freeman general manager Melandro Mendoza mipaabot sa sayong pinaskuhan ngadto sa mga nabiktima.

Lakip sa gipang-apod mao ang mga used clothings, bugas humay, noodles, mga nilata ngadto sa mga nasunugang residente nga karon kasamtangang gipahimutang sa bakanteng luna diha sa barangay health center.

Si Basak-San Nicolas barangay kapitan George Rama, nipasalamat sa foundation tungod sa oras ug pundo aron matabangan ang iyang mga konstituwente paghatag pg hinabang.

Dako usab ang iyang pasalamat kang The Freeman chairman Jose ‘Dodong” Gullas ug sa Presidente sa Philippine Star Group of Publications Miguel Belmonte gumikan sa ilang kaayo.

“Ang mga tawo nalipay kaayo kay sukad nasunogan sila permi lang bag-o ilang senina,” sumala pa ni Rama.

Samtang nipadayag siyag kasagmuyo sa ilang kura paroko nga wala gyud mopakita bisan nalang magpakabana pagsusi-susi sa kahimtang sa iyang mga parokyano.

Matud pa niini nga ang maong problema iya na hinoong gipahibalo ngadto kang Msgr. Achilles Dakay ang media liaison sa Archdiocese sa Sugbu.

Samtang sa pikas nga bahin iyang gipahibalo ang mga naapektuhang residente bisan supak ang tag-iya sa luna gitugutan nang makatukod og balik sa ilang mga balay tungod sa kakulang sa relocation site o ba kaha tungod kay wala makauyon sa relocation site.

Si konsehal Gerardo Carillo, action officer sa Cebu City Disaster Coordinating Council, una nang nipahibalo nga ang kagamhanan sa dakbayan sa Sugbu naglantaw sa pagpalit sa tipik sa maong luna aron himoong relocation sa naapektuhang pamilya.

Ang konseho nideklarar na sa maong lugar nga nasunogan nga state of calamity.

Nasayran nga moabot 70 ka panimalay ang naugdaw sa maong sunog nga niigo sa interior nga bahin sa sitio Lupa niadtong Nobiyembre 18 ning buwan. - Guam Logroño (BANAT NEWS)