Rasyon nga gas/krudo kontrolon
CEBU - Gipalabang sa konseho sa Mandaue City ang usa ka ordinansa nga magpakgang sa pagpatuyang og gamit sa gasolina sa mga sakyanan sa kagamhanan sa maong dakbayan .
Si Konsehal Emiliano Rosal nga maoy chairman sa committee on budget and appropriation sa konseho sa dakbayan maoy nangamahan sa maong ordinansa.
Base sa maong ordinansa, ang mayor adunay binuwang gahin nga 500 litros, 300 litros ang sa bise mayor, 150 litros ang matag department head ug 120 litros usab ang sa assistant department head.
Gitino usab sa maong ordinansa nga anha gyud ipundo ang nahisgutang mga sakyanan sa parking area atubangan sa city hall sa matag human sa oras sa trabaho o mga adlaw nga walay trabaho.
Ang makalapas sa maong ordinansa pahamtangan og silot nga P5,000 nga multa ug pagkabilanggo sulod sa 30 ka adlaw ug uban pa, nga mag-agad lamang usab sa hukom sa korte.
Ang maong ordinansa ni Rosal maoy mopakgang sa pinatuyang nga paggamit sa sakyanan sa gobiyerno nga gisugnoran og gasoline ug krudo nga gibayran sa buhis sa katawhan.
Ang nakaaghat ni Rosal sa pag-umol sa maong ordinansa mao ang mga report nga may mga tiggamit og sakyanan sa gobiyerno nga bisan magpunay lang og yaka sa iyang opisina, nagsige og paagas sa gasolina sa sakyan. – BANAT NEWS
- Latest
- Trending
