Bilar sa patay gi-rapido

CEBU - Duha ang patay diha-diha ug laing usa ang naangol sa dihang girapido sa tulo ka mga armadong lalaki nga nagtaptap sa nawong samtang nagkalingaw og duwa og tong-its atol sa ilang pagbilar og patay didto sa Sitio Common, barangay Daanlungsod, Medillen, Cebu niadtong Domingo sa alas 11:55 sa gabii.

Nabungkag ang tanang mga tawo nga nagbilar niadtong tungura apil na ang mga nanabtan sa pangadye human nagkatibulaag og panagan sa dihang mipaka ang buto-buto sa armas ug dayong pagkahagba sa duha ka tawo nga apil sa nagbilar diha sa gawas nga bahin.

Ang mga biktima nga patay diha-diha human makaangkon og samad pinusilan sa ulo mao sila si Inocencio Tundag, 38, molupyo sa Caputatan Norte ug Juanito Venduran, 52, minyo ug molupyo sa nahisgutang lugar.

Samtang samad pinusilan sa tuong bukton ang naangkon sa ikatulong biktima nga naila lang sa pangalan nga si Dodo Monenio, ulitawo ug molupyo sa barangay Antipolo sakop sa nahisgutang lungsod.

Matud ni PO1 Renato Nugas sa Medillen Police Station sa dihang nahinabi sa Banat News subay sa blotter nga gibasehan niini nga samtang nagkalingaw og duwa sa sugal nga tong-its ang tulo ka mga biktima diha sa gawas nga bahin sa pinuy-anan nga ilang gibilaran nga patay kalit lang mitumaw ang tulo ka mga tawong nag-bonnet.

Ang duha niini milipot sa duha ka mga biktima samtang ang usa nagsilbing look-out ug pagkahuman gidul-itan og pusil ang mga biktima nga sila si Tundag ug Venduran sa ulo sulod sa upat ka higayon ug diha-diha nahagba ang mga biktima dungan ang pagkaratol sa uban pang mga tawo diha sa bilar nga nag-iyahay og panagan aron dili mapagan sa hitabo.

Sa pag-responde sa kapolisan nakasibat na ang mga suspek nga matud sa mga nakasaksi paingon sa habagatang bahin nga direksyon samtang ang kapulisan naka-recover og upat ka basiyo sa bala sa 9mm pistol.

Ang duha ka mga biktima patay diha-diha gawas lang kang Monenio nga gidala sa Verallo District Hospital ug gibalhin dayon sa tambalanan dinhi sa siyudad sa Sugbo ug luwas na sa peligro.

Matud ni PO1 Nugas padayon pa karon ang ilang imbestigasyon pagtumbok sa mga nagtaptap nga suspek ug pagtumbok sa motibo niini. Sentro sa gitutokan nga anggulo nga posibleng personal nga panagdumot tali sa mga biktima ug suspek ang hinungdan sa krimen.

Dugang nahipos nga kasayuran nga ang patay nga gibilaran sa mga biktima usa ka babaye nga gikatahong namatay kini human maigo sa kilat didto sa barangay Dalinding Norte sa Daanbantayan apan wala hinuon makuha ang pangalan niini. (BANAT NEWS)