Septic tank killer, 2 patay

Duha ang patay samtang usa ang naluwas human mangahilo sa baho sa methane gas diha sulod sa septic tank (poso Negro) nga ilang gihabwaan og hugaw sa tawo diha sa Microtel building sa barangay Punta Engaño dakbayan sa Lapulapu kagahapon sa kaadlawon.

Ang namatay mao sila si Ricky del Pilar, 32,  residente sa barangay Sawang Calero dakbayan sa Sugbu ug Dennis Arresgado Jr. 24, lumad sa Malapascua sa Daanbantayan.

Samtang ang nakaluwas sa maong trahedya mao si Esmael Rindido, 50,  ug residente sa Poblacion, Pardo dakbayan sa Sugbu.

Base sa nakutlong impormasyon sa Banat News nasayran nga samtang padayon ang konstruksyon  sa maong hotel ( Microtel ) ang JCM Septic Services maoy nakakuha sa kontrata paghabwa sa napunong septic tank sa maong edipisyo.

Gikatahong migamit sila og motorpump suction apan giingong dili kaabot ang ilang flexible pipe ngadto sa ilawom nga gibana-banang tulo ka metros ang gilawmon hinungdan nga mikuha kini og mga tawo maoy momano-mano og habwa.

Niadtong Lunes sa gabii  pasado alas 9:30 sa kagabhion si Willy Bolabola ang representante sa JCM uban sa 20 ka tawo nga ilang gipakyaw sa paghabwa sa maong septic tank maoy mihimo sa operasyon.

Dihang gimano-mano paghabwa ang hugaw, si Rindido maoy unang misulod sa septic tank aron madali ang pagkuha sa hugaw ug madali usab ang ilang pagpanghabwa, apan naligas kini ug nahulog sa ilawom.    

Pagkakita ni del Pilar   sa maong hitabo misuway kini og  luwas sa kauban apan siya na usab ang nahulog, si Arresgado pagkakita sa nahitabo sa duha dali usab nga nitabang aron sila haw-ason apan hasta kini nahagbong sa sulod.

Ang security guard sa maong hotel dali nga nakatawag sa ERUF ug sa dihang giugkat ang tulo ka biktima sulod sa septic tank dali kini nga gidala sa Mactan Doctors hospital apan pipila ka gutlo nakabsan gyud sa ilang kinabuhi sila si del Pilar ug Arresgado gumikan kay nalumos kini sa baho sa maong tangke.

Samtang ang ilang giluwas nga si Rindido naluwas gyud sa duha ug kasamtangang giobserbahan karon sa mga mananambal.

Matod pang Bolabola walay angayang kabalak-an ang mga tagtungod sa mga nabiktima gumikan kay misaad si Jessa Monteclar ang tag-iya sa JCM nga silay moabaga sa tanang galastuhan sa kamatayon ni del Pilar ug Arresgado ug sa survivor nga si Rindido.