Tindahan gilungkab P300 mil nadala

Mokabat sa P300 mil ang nasakiyo sa mga wala mailhing kawatan human gilungkab ang Unitop Shopping Center nga nahimutang diha eskina sa Osmeña Blvd. ug D. Jakosalem sa barangay  Sto. Niño ning dakbayan.

Usa ka Raymond Go, representante sa maong tindahan ang nidangop sa Theft and Robbery Section sa Cebu City Police Office human nabantayan niining atol sa pag-abli giguba na ang vault ug naguba na usab ang ilang kisame.

Matud pa ni SPO2 Ulysses Racaza,  imbestigador sa TRS nga ilang gituuhang  duha ngadto sa tulo ka mga kawatan ang nihimo niini ug migunting sa atop ug giguba ang kisame aron makasulod.

Ang mga kawatan misulod dayon sa gibutangan sa vault ug gilungkab kini ug gidala ang nahisgutang salapi.

Usa ka tanod nga nag-roving diha sa dalan Legaspi sa may luyong bahin sa Unitop ang nakakita og sinumpay-sumpay nga habol nga nagbitay gikan sa ibabaw, usa sa mga tupad nga establisamento sa Unitop kansang tumoy nasangyad na sa dalan.

Daling gipahibalo sa maong tanod ang nakit-an sa ilang barangay kapitan ug gimandoan siyang papaniiron una sa dapit apan gikatahong kalit lang nga dihay taxi nga nag-parking diha sa lugar ang kalit nga mipasirit palayo.

Nasuta nga ang duha sa mga sinumpay nga habol iya sa Hope Pension House, dihang ilang gisubay nasuta nga dunay duha ka mga lalaki ang ni-check-in mga alas 10:36 niadtong Miyerkules sa gabii ug ni check-out kini mga ala  1:36 sa kaadlawon kagahapong adlawa ug namatikdan usab nga wala na diha ang beddings sa room 301 nga giokupar sa duha.

Sumala pang Racaza nga wa marekord ang mga pangalan sa duha tungod kay polisiya na sa Hope Pension House nga di isulat ang mga shortime nga pag-okupar sa ilang mga lawak.

Ang hepe sa TRS, Sr. Insp. Michael Anthony Bastes nagdudang mga sakop sa “Vault Gang” ang grupong miigo sa Unitop ug ila na karong gisubay.