Gumikan sa biyuda sikyo gidunggab

Gumikan sa usa ka biyuda, gidunggab sa usa ka security guard ang usa ka drayber sa taxi  didto sa sitio Caimitohan, barangay Basak dakbayan sa Lapulapu sa milabay'ng gabii.

Ang biktima mao si Arnold Bismanos, 28, ulitawo, ug residente sa Caimitohan, usa ka taxi driver.

Samtang ang midunggab kaniya  mao si Roel Manco, 25, ulitawo, ug usa ka security guard, 

Gawas sa  dinunggaban nabun-og pa si Bismanos sa kalawasan kay gitabangan siyag kulata sa mga kauban ni Manco..

Ang mikulata sa biktima nailhan usab nga sila si Raul Montera, Richmond Lagura, Eric Manco Nuñez, ug Reymar Lagura.

Matud pa ni SPO1 William Homoc sa Homicide Section sa kapolisan sa Lapu-lapu nga naglakaw sa karsada ang biktima dihang nasugatan sa suspetsado ug mga kauban ug sa way daghang estorya gihansakan kini sa kutsilyo ug maayo nalang kay  nakahupo ang biktima hinungdan nga ang iya rang abaga ang nasamdan

Nakadagan ang biktima apan gigukod  sa mga kauban sa suspetsado ug gikulata siya.

Maayo nalang kay wa maintimano ang biktima ug nadala pa kini sa tambalanan sa dakbayan.

Nasayran ni Homoc nga naglagot ang suspetsado sa biktima kay may relasyon diay ang naulahi  ug si Juvelyn Beduya Mata, nga maoy gikapuyo karon sa suspetsado.

Hinoon nadakpan sa kapolisan si Manco  ug ang mga kauban niini ug sa pagkakaron nagtingkagol na sila sa prisohan sa maong siyudad.