2 Lalaki Nangawat Sud Sa CPPO

Duha ka mga lalaki ug usa ka minor de edad ang nadakpan human naaktuhang nangawat sulod sa provincial police headquarters diha sa Sudlon, Lahug ning dakbayan kagahapon sa kaadlawon.

Ang nangadakpan ug anaa karon sa Mabolo detention cell giila nga sila si Christopher Lopez Mejares, nga taga barangay Papan lungsod sa Sibonga, usa ka ginganlan og Allan Sato, nga taga Salinas drive barangay Lahug kinsa maoy driver sa PUJ nga may rotang O4D nagtangag sa plaka GWB 271 ug ang usa ka menor de edad nga lalaki nagpangidaron 15 anyos.

Naaktuhan ni PO2 Abraham de Jesus kinsa maoy duty niadtong tungora ang duha nga nitangtang ug mikarga sa propeller shaft sa 6X6 truck nga gi-parking daplin ug sulod sa provincial headquarters

Ang maong polis nag-roving sulod sa kampo apan iyang nakit-an sila si Mejares ug Sato nga paingon nang magkarga sa kinawat ngadto sa PUJ nga gi-parking sa unahan gawas sa headquarters.

Narekober ni Abraham sulod sa PUJ ang muffler, radiator, motor starter, cross-member sa transmission ug propeller shaft ug uban pa nga nagkalain-laing mga pisa sa sakyanan.

Nasuta nga anak ni Sato ang 15 anyos nga lalaki apan wala na kini apila og dakop ug gi-turn over ngadto sa inahan niini nga si Jasmine.

Si Supt. Erson Digal,  ang deputy director for operation  sa  CPPO, miingon nga iyang gimanduan ang in-charge diha sa ganghaan sa CPPO nga wala nay pasudlon nga mga sibilyan ilabi na kung Sabado ug Domingo

“Wala ‘ta makahibalo nga basin kita lang pud ang gibantayan aron makahigayon sila og pangawat,” nipasabot si Digal.

Si Sr. Supt. Carmelo Valmoria sa pakighinabi sa mga tigbalita kagahapon nitug-an nga ilang gi-review ang security sa maong kampo ug misalikway nga dunay kakunsabong polis ang duha.

Dunay usa ka shop dili layo sa kampo ang gikatakdang apilon sa imbestigasyon tungod kay nasayran nga giingong ilaha ang maong mga tools nga gigamit sa pagtangtang sa maong mga piyesa.

Matud pang de Jesus sa pakighinabi ang mga kawatan diha miagi sa gibanlas sa tubig baha kilid sa kural nga barbed wire kilid sa dalan nga ngitngit kaayo sanglit walay suga ang maong dapit sa kampo.