Carcar cops may medalya

Gikatakdang hatagan og mga medalya ug mga pasidungog ang 24 ka mga polis sa Carcar police station nga nalambigit sa pagpakgang sa pagtulis sa Rural Bank of Cebu South Inc. karong umaabot nga adlaw'ng Lunes sa Police Regional Office –7.

Si Sr. Supt. Carmelo Valmoria, director sa Cebu Provincial Police Office mitug-an nga napadangat na niya ang report ug mga dokumentos para sa maong katuyoan ngadto sa buhatan ni Chief Supt. Ronald Roderos.

Lakip sa makadawat og pasidungog mao ang mga sakop sa Regional Mobile Group nga miapil sa pagresponde diha sa maong dakbayan samtang nagpaabot sa pag-abot ni Presidente Gloria Macapagal Arroyo kinsa mobisita niadtong adlawa diha sa San Fernando.

Matud pang Valmoria makadawat og taas-taas nga matang sa medalya sila si SPO1 Meliton Agadier ug SPO1 Kenneth Abella kinsa maoy unang niabot sa maong dapit ug nakigpinusilay sa mga tulisan.

Napatay sa maong hitabo si Nelson Gutierrez samtang nasamdan ug nadakpan ang kauban niini nga si Recoly Igoy dihang nakigsinukliay og bala ngadto nila ni Agadier ug Abella hangtud nga hasta ang ubang polis nga nangabot usab nakaapil na sa engkwentro.

Gawas sa hataga og pasidungog gikan sa PRO-7 mao ang ilang hepe nga si Supt. Teofilo Siclot. Gikatakdang duna say laing pasidungog nga madawat ang maong mga polis gikan sa dakbayan sa Carcar pinaagi ni Mayor Patrick Barcenas.

Si Barcenas daan nang mipadayag nga mohatag siya og pasidungog ug ingon man cash nga pahalipay sa maong mga polis agi’g pagpasalamat.