Fetus napalgan nasad

Gibana-bana sa kapulisan nga nagpangidaron pa sa lima ka bulan ang usa ka lalaki nga fetus nga nabangalan sa usa ka lumulopyo diha sa Sikatuna St.,  barangay Zapatera  sayo sa buntag kagahapon.

Usa ka Ervin Tamayo 22 walay trabaho ug nagpuyo   sa nahisgutang  barangay ang nakakita sa maong fetus mga alas 5:00 sa buntag kagahapon duol sa pader sa ilang panimalay.

Si Tamayo miasoy sa kapulisan nga  nagbarog-barog siya sa gate sa ilang panimalay dihang iyang nakita ang usa ka yellow nga plastic bag nga gibutang duol sa pader sa ilang panimalay.

Matud pa niini nga iyang gisusi kun unsay sulod sa maong yellow nga plastic bag apan sa iyang paglantaw nangangha na lamang siya gumikan kay usa ka fetus ang sulod niini.

Nidali   siya sa pagtawag sa kapulisan aron  itaho ang iyang nakita, sa pagkakaron ang maong fetus tua na sa usa sa mga punerarya ning dakbayan.