“Wet summer” ang masinati sa nasud karon

Ang mga tinugyanan sa panahon mibutyag nga gumikan sa La Niña, masinati sa nasud karon ang “wet summer” o panahon sa ting-init nga ting-uwan.

Matud pa ni Mario Sarbida,  weather forecaster sa Philippine Atmospheric Geophysical and Astronomical Services Administration (PAGASA) nga nakatampo usab niining “wet summer”  ang hangin nga amihan.

Kasagaran ang mga buwan sa Marso ngadto sa Mayo maoy panahon sa ting-init dinhi sa nasud, apan sukad madiskobre ang gitawag nga La Niña ug El Niño nga kahimtang sa panahon sa kalibotan, nagsunodsunod na  ang pagkahimong ting-uwan sa panahon sa ting-init dinhi sa nasud.

Gani matud pa ni Sarbida nga sukad sa tuig 2000 makatulo na ka higayong nasinati sa nasud ang sagunson nga uwan uban ang kabugnaw sa panahon sa mga buwan nga gikan sa Marso ngadto sa Mayo.

Tungod niini si Sarbida miingon usab nga kun gikinahanglang bagyohon ang panahon sa ting-init, dili makalikay ang nasud niini tungod kay matag tuig naghulga sa nasud ang dili mominos 20 ka bagyo, gikan sa Enero hangtod sa Disyembre.

Midugang si Sarbida nga gumikan sa ka walay kasiguroan karon sa bawod sa dagat nga mugna sa hanging amihan, mas maayong dili mokumpiyansa ang mga biyahidor sa kadagatan ug bisan ang mga mananagat.

Sa milabay nga buwan may mga natikyaob nga mga sakyanan sa kadagatan nga mibiyahe tali sa Cebu ug Bohol.

Hinuon gipaniguro ni Sarbida nga ning mga panahona way sinyas sa bagyo nga naghulga sa nasud base sa mga datos nga ilang nahipos.