Gisakdapa’g dunggab sa nagmotor

Usa ka lalaki nga nagsakay og motorsiklo ang giatngan sa wala mailhing tawo ug gidunggab patay didto sa Badian, Sugbu niadtong Miyerkules sa barangay Banhigan.

Segun sa report nga nidangat sa Provincial Police ang kapolisan sa Badian nakadawat og report gikan sa usa ka concern  citizen.

Daling gisusi ang dapit sa kapolisan uban ang Municipal Health Oficer, Dr. Arduja Espirito ug ilang naabtan nga nagbuy-od sa karsada ug wala nay kinabuhi ang biktimang si Randy Benemito, 21, ulitawo ug residente sa naasoy’ng dapit.

Nasayarn ang biktima gikan nitambong og birthday party sa panimalay sa iyang higala nga si Tata Velarde kinsa nagpuyo usab sa nahisgutang barangay.

Samtang ang biktima padulong nang mopauli sakay sa iyang motorsiklo apan pag-abot sa nahitaboan kalit lang gidunggab sa makausa ka higayon ug naigo sa tuong kilid sa iyang lawas.

Nagduda ang kapolisan nga giatngan nang daan ang biktima sa wala mailhing mamumuno.

Apan sa gihimong pakisusi ni Dr. Espirito sa patay’ng lawas sa biktima nasuta nga hemorrhage ang namatyan niini dili ang samad dinunggaban nga iyang naangkon.

Gituohang nabunal ang ulo sa biktima human sa iyang pagkalamba sa sementadong karsada dihang siya gidunggab nga maoy nakaingon sa hinanali niining kamatayon.

Ang kapolisan sa Badian padayon pang nagpakisusi sa dapit kung si kinsa ang tawo nga nakasaksi sa maong hitabo aron mailhan ang nidunggab sa biktima.