Kandidata pagka-mayor ‘sikop

Naparot nga kandidata sa pagka-mayor dinhi sa dakbayan sa Sugbu gisikop sa mga sakop sa Punta Prinsesa police station tungod sa kasong malicious mischief nga gipasaka kaniya sa iyang bayaw.

Si Leah Ong, 50, residente sa Bayabas St. sa barangay Punta Prinsesa gidakop nila ni SPO3 Alfredo Amarro, ang warrant officer sa maong police station pinasikad sa warrant of arrest nga giluwatan ni MTCC Branch 8 judge Edgemelo Rosales.

Usa ka Alberto Migraso, bayaw ni Ong ang gikatahong complainant sa maong kaso.

Si Ong sa pakighinabi sa mga sakop sa media mipasangil nga gibutang-butangan lang siya og kaso sa iyang bayaw. Matud pa niya nga nagsugod kining tanan tungod sa panag-ilog nila sa yuta sa iyang mga igsuon.

Gikatahong gipasanginlan siyang nangguba og kural nga hollow blocks nga giingong gikural ni Migraso apan iya kining gipanghimakak ug gani nadala na kini sa Lupon ng Tagapamayapa sa maong barangay.

Mipasangil siyang dili patas ang Lupon sanglit makausa lang sila gihusay sa maong kaso ug gipasa na ngadto dayon sa piskalya bisan wala pa nila kini maresolbar diha palang sa level sa barangay.

Nagduda si Ong nga posibleng gisakyan kini og mga dagkong politiko ug buot dauton ang iyang pagkatawo. Gani hasta si Mayor Tomas Osmeña gihinganlan niya nga posibleng nagpaluyo sa iyang gidangatan karon base usab sa iyang mga nadunggan nga ‘manggukod’ kini sa iyang mga kontra sa politika ug gihimo niyang sanglitanan ang nahitabo kang Lahug barangay Kapitan Mary Ann delos Santos.

Sumala pang Ong, maong napugos siya pagdagan pagkamayor sa miaging piniliay tungod usab sa awhag sa mga silingang kabus ingon man mga ordinaryong residente ug mga kaila nga gihulagway niyang napasagdan na sa gobiyerno.

Samtang giangkon niya nga wala siya mokuha og abogado sa maong kaso tungod kay wala na siya’y salig sa mga abogado tungod kay “I date-date” lang daw siya niini ug hulgaong dili buhaton ang tanan aron siya maluwas sa kaso kung dili siya mosugot sa ilang mga gusto.