Gwen dismayado labot sa lamp posts overpricing

Dismayado si Gob. Gwendolyn Garcia sa kontrobersiya karon sa mahalong decorative lamp posts nga gigamit sa rota sa ika-12 nga Association of Southeast Asian Nations Summit niadtong buwan sa Enero.

Kini ang gipadayag ni Capitol consultant, Atty. Pablo John Garcia, atol sa 888 News Forum sa Marco Polo Plaza Hotel kagahapon.

Matud pa ni Pablo John nga giisip sa gobernador nga sentimental ang kalampusan sa Asean Summit nga gipahigayon sa Sugbu apan wala damha nga dunay nagpabiling kontrobersiya human gikataho nga "overpriced" ang presyo sa lamp post sa tag P224,000 base sa pangangkon sa Department of Public Works and Highways.

"The governor is dismayed that these reports are coming out," nagkanayon si Pablo John bisan walay kalambigitan ang Kapitolyo sa pagpamalit sa maong butang.

Giklaro ni Garcia nga ang papel sa lalawigan sa Sugbu sa pag-host sa Asean Summit mao ang pagpatukod sa Cebu International Convention Center nga lugar sa pipila ka tigum may kalabutan sa Summit.

Matud pa ni Garcia nga gitugyan nalang sa gobernador ngadto sa buhatan sa Ombudsman ang imbestigasyon sa maong kaso aron matumbok kon kinsa ang responsable sa giingong pagpataas sa presyo sa lamp posts.

Samtang ang oposisyon sa konseho sa dakbayan sa Mandaue ang gikatakda usab nga motuki sa isyu sanglit gitumbok nga ang lokal nga kagamhanan ang may kalambigitan sa pagpamalit sa decorative lamp posts ug si Mayor Thadeo Ouano ang naghimo sa program of works.

Matud pa ni Konsehal Jonas Cortes nga ilang ipatawag ang supplier sa suga aron pagtino sa tinud-anay nga presyo niini.