P2M danyos ni Seniang

Ang bagyong Seniang nga miigo dinhi sa Sugbo wala gayud magbilin og dakong kadaut bisan pa kun gipaubos pa sa Pagasa sa storm signal number 3 ang amihanang kalungsoran niini.

Kini ang nasayran sa Banat News kang Dorris Alegado sa office of civil defense sa Sugbo nga gikahinabi sa Banat News kagahapon.

Kini ang ilang kasayuran gikan sa mga taho nga nadawat sa ilang buhatan sa Department of Public Works and Highways, (DPWH) kapolisan ug mga lokal nga kagamhanan sa kalungsoran ug mga dakbayan.

Matud pa niya nga sa Daan Bantayan mao'y gikataho nga usa lamang ka balay nga ginama sa light materials ug pipila ka mga sanga sa kahoy ang nangabali ug natumba.

Ang ilang buhatan wala pa usab makadawat og mga taho sa kinabuhing nakalas o biktima sa paglunop o kalit nga pagbaha sa sapa.

Si Alegado miingon nga atol sa pagbunok sa ulan ug paghuros sa hangin ang amihanang kalungsoran ang nakasinati gayud og pakapawong sa elektrisidad dihang kalit lang naputol ang koneksiyon sa Transco ug Cebu Electric Co.

Dugang pa niya nga ang mga municipal disaster coordinating council sa kalungsoran ug city disaster coordinating council maoy ilang nahibaw-an nga milungtad gyud og pipila ka oras sa pagkaputol sa ilang supply sa kuryente.

Naglakip sa mga lungsod nga nawad-an sa ilang kuryente mao ang Compostela, Bogo, Danao, Sogod, Tuburan, Tabuelan, Daan Bantayan, Bogo, Catmon ug lakip sa mga isla.