Gipusil sa ulo namatay

Patay ang usa ka tawo sa Sitio Calindoy, Liboron, Carcar kinsa kalit lang gipusil sa ulo sa makadaghang higayon sa miaging gabii.

Ang namatay mao si Jessie Cona, 55, minyo ug trabahante sa poultry nga nahimutang sa maong dapit.

Si PO3 Alex Padin sa kapolisan sa maong lungsod nga gikahinabi sa Banat News miingon nga wala mailhing mamumuno ang nagpusil patay sa biktima.

Matud pa niya nga nag-inusara ang biktima nga natulog sa sulod sa gipuy-ang panimalay ug gisaka kini ug gipatay.

Dugang pa niya nga wala pa usab matino ang kalibre sa armas nga gigamit sa pagpatay sa biktima sanglit sa crime scene wala man gyoy napalgan nga kabhang sa bala.

Si PO3 Padin miingon nga dali kaayong nakasibat pahilayo sa maong dapit ang wala mailhing mamumuno ug walay usa sa mga silingan nga nakakita.

Si SPO4 Norman Lapina sa kapolisan sa maong lungsod miingon nga ang kalambigitan sa panagbangi sa trabaho maoy usa sa mga anggulo nga ilang gisusi.