Display center sa motor gitulis; wad-a'g P40mil

Gitulis sa duha ka armadong mga lalaki ang usa ka display center sa mga motorsiklo ug nakuha ang kapin sa P40,000 nga kinolekta.

Ang gitulis ala 1 pasado ang takna niadtong miaging hapon mao ang Eversure Maxim Inc. nga nahimutang sa Highway, Tabok, Mandaue.

Si Michael Nabua, 22, ulitawo nga taga Loon Bohol nga gisukitsukit nila ni PO3 Antonio Batucan mitug-an nga kalit lang silang gisulod sa duha ka wala mailhing lalaki nga nagpaaron ingnong kustomer.

Samtang nagpadayon ang pagkukabildo kalit lamang kining miibot sa giluklok nga armas ug mideklarar nga tulisan.

Matud pa ni PO3 Batucan nga ang maong mga tulis mipasulod sa mga kawani sa sulod sa ilang buhatan.

Nakamatikod niini si PO2 Napoleon Abella nga nadestino nga beat patrol nga nagbarog sa unahang bahin sa maong dapit nakalabay ang pipila ka gutlo human sa maong pagpanulis.

Nagdali sa pagpangayog back up sa iyang mga kauban ug gigukod ang mga tulisan apan dali kining nakapahilayo.

Matud pa ni P03 Batucan nga may mga gikatahapan na silang tulisan sa maong dapit ug padayon na kini nilang gipanid-an.