Minor gilugos sa kasagbutan

Usa ka babaye nga minor de edad gilugos sa iyang silingan sa may kasagbutan niadtong Lunes sa alas 11 sa gabii sa Sitio Dita, Marangob, Bogo, gibanabana nga 8 kilometro ang gilay-on gikan sa Poblacion.

Apan nareport sa kapolisan sa Bogo niadto lang Miyerkules sa hapon, human ang biktima gikuyogan sa iyang inahan aron itaho ang gidangatan sa anak.

Ang biktima mao si Gerena (dili tinood nga ngalan) 16, nga nagpuyo sa maong lugar.

Samtang ang gitumbok nga maoy milugos sa biktima mao si Regan Sipay, 20 anyos, ulitawo, silingan sa biktima.

Si PO1 Glizelda Dignos, women desk officer sa Bogo Police Station nga nahinabi sa Banat News miingon nga samtang ang biktima natulog sa balay sa iyang iyaan, ang suspek nga si Sipay diha sa silong sa balay ug misampit sa biktima nga pakanaugon sa silong kay dunay importanteng estoryahan tali nilang duha.

Sa dihang nanaog na ang biktima sa silong, giingong kalit lang gibira ang biktima ug gidala sa may kasagbutan ug didto milampos ang suspek sa paglugos sa biktima.

Wala makapalag ang minor de edad tungod sa kakusgan sa suspek.

Matud ni PO1 Dignos nga sa dihang naabot sa ilang buhatan ang biktima niadtong Miyerkules nagmulo kini sa kasakit sa tiyan, ug mitug-an nga nakuha gayud ang iyang pagkababaye.

Ang kapolisan sa Bogo nagpaabot pa sa resulta sa doktor aron maoy mahimong basehan sa ilang pagpasaka og kaso batok sa suspek.