Duha ka polis nakulatahan

Usa ka bag-ohay pang nasulod pagka-polis ug kasamtangan pang gibansay sa Field Training Program deriyot mapusili sa gidudahang bigtime drug pusher diha sa Sitio Mahayahay Calamba ning dakbayan niadtong milabay'ng Sabado sa hapon dihang gidumog sa mga tawo ug nakigsinukliay sa bala ang duha ka back-ups sa maong pusher ngadto sa mga polis human dakpa ang usa ka babayeng level three drug pusher.

Ang maong operasyon miresulta hinuon sa pagkapusil sa maong bigtime drug pusher nga si Vivencio Baldesamo Jr. alyas "Junjun" residente sa maong dapit ug pagkasakmit sa drogas ug armas niini.

Si PO1 Benjie Gan, kinsa gidestino sa Pardo police station alang sa iyang field training program, wala pay giisyung armas nakaangkon og dakong gisi sa tuong kilay ug ubay-ubayng bun-og sa kalawasan, lakip sa nabun-og mao si SPO1 Glenn Largo kinsa dakong pangos diha sa tampihak duol sa tuong mata ang nahiaguman.

Una pa ang hitabo sa Calamba ang grupo ni SPO1 Largo, PO2 Jonathan dela Cerna PO2 Joel Lacson ug PO1 Gan milaang sa usa ka level three pusher sa Villa Bulsita ,Pardo nga si Anabelle Abellana, 40, diin si Gan maoy poseur buyer nga mipalit og P300 nga shabu.

Sumala pa ni Sr. Inspector Alexis Relado ang hepe sa Pardo Police Station si Abellana midala kang Gan diin misunod ang tulo ka mga kauban niini sa Calamba sanglit diha kini magkuhaan og shabu kang Baldesamo.

Dihang natunol ni Abellana ang tulo ka putos nga may sulod nga gidudahang shabu kang Gan giaresto siya sa naulahi ug giposasan, apan diha-diha gidumog sa mga residente si Gan ug gitabangag kulata, usa sa gitumbok ni Gan nga mikulata niya mao si Balderamo kinsa migamit og bisekleta sa paghapos diha sa iyang ulo hinungdan sa pagkasamad sa kilay sa maong batan-ong polis.

Diha-diha miresponde sila si Largo apan hasta sila giapil og kulata hinungdan nga mibunot sila sa ilang armas apan giingong nibunot na usab si Baldesamo og armas ug gitiunan sa walay armas nga si Gan, hinungdan nga gipabuthan kini ni Largo diha sa bitiis.

Nianang tungura dunay laing duha ka mga back-up si Balderamo nga armado usab og kalibre 45 ug nakigpinusilay sa mga polis apan dangtan pila ka gutlo daling nanagan ikyas.

Nakuha gikan kang Baldesamo ang usa ka kalibre 45 pistola, nga may duha ka buhing bala ug duha ka dagkong plastik nga may sulod nga gidudahang shabu. Dali kining gidala sa Cebu City Medical Center apan nagpabalhin sa usa ka pribadong tambalanan.

Si Supt. Pablo Labra sa Criminal Investigation and Intelligence Branch mitug-an sa mga tigbalita kagahapon nga sa intelligence report ang duha ka back-ups ni Baldesamo usa ka aktibong polis sa Talisay ug ang usa dugay ng nag -awol.

Ang maong impormasyon kasamtangan ng gisubay sa CIIB ug Pardo police lakip na ang pagpangita og testigo nga makatumbok sa duha aron malakip kini sa pasakaan og kaso.

Si Labra sa pakighinabi sa Banat News mitug-an nga si Baldesama naa sa ika- pito sa 10 drug personalities sa listahan sa dakbayan ug kapolisan diin ang operasyon niini tibuok lalawigan sa Sugbu.

Ang maong operasyon nasundan pagkasikop pipila na ka adlaw sa number 2 drug personality sa dakbayan sa Sugbu nga si Christopher Ocarol alyas "Rikking."