Tigulang babaye patay sa disgrasya

Usa ka 60 anyos nga tigulang babaye namatay human nadasmagan og motorsiklo ug naangol usab ang drayber alas 6:45 sa milabay'ng gabii sa Sitio Suba, Bajay, Sibonga.

Ang namatay giila nga si Melina Lauron, minyo, nagpuyo sa naasoy'ng lugar, samtang ang nakadasmag giila nga si Rodel Puerto, 25, ulitawo nga taga Media, Argao kinsa nagmaneho sa Ranjet 100 kolor blue nga motorsiklo.

Sigon sa report ni PO3 Ederlino Bacusmo nga samtang nagmaneho si Puerto sa iyang motor subay sa highway paingon pauli sa Argao, iyang nabanggaan si Lauron nga naglakaw hinungdan nga nalamba sila sa sementadong dalan.

Nakaangkon og daghang pangos ug bun-og sa iyang kalawasan si Lauron lakip na sa ulo samtang si Puero nakaangkon usab og pangos ug bun-og sa lawas niini.

Si Lauron namatay samtang giatiman sa mga doktor sa Vicente Sotto Memorial Medical Center.