Babayeng pusher 'sikop sa Mandaue

Babaye nga gidudahang supplier og drugas sa Mandaue nasikop atol sa buybust operation sa kapolisan sa Presinto 5 sa Mandaue City Police Office kagahapon sa kaadlawon.

Ang nasikop mao si Sheryl Talingting, 33, minyo ug nagpuyo sa sitio Ilog, Opao, Mandaue.

Base sa imbestigasyon sa kapolisan, nasuta nga dugay na nilang gipanid-an si Talingting nga maoy nagsuplay og drugas sa maong dapit pinaagi sa wholesale nga presyo diin ang pito ka deck sa shabu ibaligya lamang kini sa P500 ug ang pusher mao nay mobaligya og P100 matag usa niini nga moginansiya kini og P200.

Kagahapon sa alas 5 sa kaadlawon mipahigayon og buybust operation ang mga sakop sa kapolisan sa Presinto 5 pinangulohan ni Insp. Leoncio Baligwat ngadto sa panimalay ni Talingting.

Human nga gidawat ni Talingting ang P500 nga marked money gikan sa decoy sa kapolisan gisikop kini ug nakuha ang usa ka putos nga dunay sulod nga pito ka gagmay'ng pakete sa gituohang shabu, P500 nga buybust money ug mga kagamitan sa pagsuyop og shabu.

Matud pa ni Baligwat nga usa sa ilang dinakpan sa ilegal nga drugas niadtong petsa 31 sa Marso ning tuiga nga si Emma Binarao mikompirmar nga si Talingting maoy iyang kuhaanan sa drugas sa ilang dapit.

Samtang si Talingting miangkon sa maong salaod, apan mirason nga napugos lamang siya pagsulod sa maong ilegal nga negosyo gumikan sa kawad-on.

Ang kapolisan sa Presinto 5 padayon pang nagsukitsukit ni Talingting aron hibaw-an asa tigkuhaan og daghang suplay sa shabu ang dinakpan. Si Talingting kasamtangang gitanggong sa Presinto 5 ug pasakaan kini og kasong kalapasan sa Akta Republika 9165 ubos sa Section 5 Art. II kung pagpayuhot sa ginadiling drugas.