Amahan ug anak namun-og gipangita

Gipangita sa kapolisan ang amahan ug anak nga gipasanginlang nagtinabangay sa pagbun-og sa ilang silingan niadtong miaging Sabado sa hapon sa Alliance of Two Hearts, Basak, Mandaue.

Ang gipangita mao sila si Ronnie Candilario, ug ang anak niiining si Emmanuel Candilario, pulos mga nagpuyo sa maong dapit.

Ang gitabangan sa duha mao si Welfredo Jordan, 46 anyos, minyo ug silingan sa mga suspetsado sa nahisgotang dapit.

Si PO2 Roberto Neri, PO1 Melvin Pelayo ug PO1 Marlowie Binangbang sa kapolisan sa Presinto 3 sa Basak nga gikahinabi sa Banat News miingon nga nagkalalis ang biktima ug ang suspetsado.

Ang panaglalis daw misangko sa pagsinumbagay hangtod nga nahidangat si Emmanuel nga nagdala og tubo nga puthaw nga maoy gihapos sa ulo sa biktima.

Ang biktima nga daw nalipong sa maong pagbunal dali nga gidala sa Vicente Sotto Memorial Medical Center ug padayon kining giatiman sa mga doktor.