Mga municipal engineer gikasab-an ni Gwen

Gikasab-an kagahapon ni Gobernador Gwendolyn Garcia ang mga sakop sa board sa Cebu Organization of Municipal Engineers Incorporated atol sa gipahigayon nilang induction of officer kagahapon tungod kay wala sa saktong panahon ug lugar ang pagpadayag nila sa ilang mga yangongo sa gobernador.

Atol sa speech ni Engr. Rodney Menchavez, presidente sa maong grupo, nangayo kang Garcia og usa ka buhatan diha sa kapitolyo para sa ilang grupo, service nga sakyanan ug computer.

Si Garcia kinsa giimbitar nga magpahurar sa mga opisyal sa organisasyon nagkanayon nga ang maong yangungo pwedeng adto hisgutan sa iyang buhatan Ug dili i-atol sa maong okasyon.

Si Garcia mipahimangno sa mga opisyal ug sa mga municipal engineer sa kalungsuran nga susihon una ang mga program of works kun angayan ba kining tugotan.

Matud ni Garcia nga adunay mga kalungsuran nga gustong magtukod og mga barangay hall nga dagko kaayo o mga mapagarbuhon nga edipisyo.

Si Garcia nagkanayon nga ang angayang unahon nga mga proyekto mao ang mga panginahanalan sa mga lumolupyo sa mga kalungsuran sama sa patubig, kuryente ug kadalanan.

Ang nahisgutang mga proyekto lakip sa 10-point agenda ni Garcia.