Barko naglawig nasunog

Barkong pasaheroan nasunog diha sa kadagatan sa Bulalagui Point duol sa Bantayan Island kagahapon pasado alas 12 samtang naglawig gikan sa Manila padulong nganhi sa Sugbo.

Ang mga pumpboat sa kabarangayang lungsod sa Daanbantayan mipaduol sa maong barko aron matabangan kung gikinahanglan ang mga pasahero sa Superferry 12.

Pipila sa mga pasahero ang mi-text na sa mga sibyaanan sa Sugbo ug ilang mga kabanay kabahin sa ilang kasinatian nga nakapabalaka sa mga kabanay sa mga pasahero dinhi diin miingong gisuotan na sila og mga lifejackets.

Si Cebu Coast Guard Station Commander Manolito Malig-on mitug-an sa Banat News nga sa inisyal nga taho nga ilang nadawat ang nasunog mao ang ika-upat nga deck sa cabin area apan sa gipadalang report sa Superferry dinhi sa Banat News nga diha magsugod ang kalayo sa stateroom.

Nagsugod ang maong sunog alas 11:50 sa buntag ug napawong lang kini pagka 1:10 na sa hapon samtang nag-urong diha sa kadagatan sa Bantayan. Matud pa ni Malig-on ang maong barko migikan sa Manila niadtong Miyerkules pasado sa alas 6 sa hapon ug gikatakda untang moabot sa Sugbu alas singko kagahapong adlawa.

Ang maong barko dunay 639 ka mga hamtong ug 26 ka mga batang pasahero ug duna kini 145 ka mga tripulante. Hinuon walay natahong nangasakitan sa maong insidente ug wala irekomendar sa mga opisyal sa barko ang pag-abandonar sa maong barko.

Ang BRP Pampanga sa Coastguard District nga nagbase dinhi sa dakbayan sa Sugbu miapas kagahapon sa maong barko aron mapahigayon na ang pagsusi sa hitabo

Mismong si Mayor Maria Loot sa Daanbantayan nakakita sa sitwasyon sa barko dihang ang mayor mitambong sa usa ka meeting diha sa isla sa Malapascua kagahapon.

Samtang si Sr. Supt. Vicente Loot ang hepe sa Cebu Provincial Police Office mimando dayon kagahapon sa mga police stations sa Medellen, Bogo, San Remegio aron sa pagpadala og mga pumpboat ug mga bangkang panagatan paduol sa maong barko.

Matud pa ni Malig-on nga mas maayo nga nahitabo ang sunog nga adlawan kay delikado kini kun nahitabo og gabii.

"Kung gabii ni nahitabo mas delikado kay mag-panic man gyud ang mga pasahero," asoy pang Malig-on.