Anak 'misunog' sa balay sa ginikanan

Usa ka 33-anyos nga lalaki miunay sa pagsunog sa balay sa iyang ginikanan niadtong Sabado sa hapon diha sa Cabungahan dakbayan sa Danao.

Natingkagol sulod sa Danao detention cell si Rogelio Montes usa ka construction worker, residente sa nahisgutang lugar human niini sunoga ang balay sa iyang ginikanan.

Ang biktima mao si Sofronio Montes 66-anyos kinsa daling mitaho diha sa kapolisan sa Danao sa maong hitabo.

Base sa spot report diha sa Cebu Provincial Police Office (CPPO) nga si Rogelio nanghasi sa iyang ginikanan hangtod nagdaub kini og mga sinena diha sulod sa balay ug maoy sinugdanan sa sunog nga nakaugdaw sa balay ni Sofronio.

Base usab sa spot report nga tulo ka adlaw sa wala pa mahitabo ang insidente si Rogelio mibahad ni Sofronio nga iya kining patyon.

Si Rogelio nasikop nila ni Felix Batoon ug Alfonso Batucan mga tanod sa Cabungahan.

Apan sukwahi ang gibutyag ni SPO1 Jose Relampagos sa Banat News kagahapon sa natala sa spot report kabahin sa maong insidente.

Matud ni Relampagos nga base sa ilang blotter, si Rogelio hubog nga nanghasi ug giunay sa paghabas gamit ang usa ka sundang ang napulo ka punoan sa saging ni Sofronio.

Si Relampagos nagkanayon nga si Sofronio maoy miunay sa pagsikop ni Rogelio ug gitugyan kini sa mga polis nga mirepsonde sa insidente.